Сурхондарё вилоятидаги Сариосиё аэропортида фуқаро авиацияси фаолияти тикланади. Бу ҳақда 17 ноябрь куни вилоятни ижтимоий-иқтисодий ривожлантириш юзасидан Шавкат Мирзиёев раислигида бўлиб ўтган йиғилишда маълум қилинди.
.jpg)
Йиғилишда қайд этилишича, вилоятнинг туризм салоҳияти анча юқори, бу ерда 600 дан зиёд маданий мерос ва туризм объектлари бор. Самарқанд—Китоб —Денов—Олтинсой —Термиз маршрути бўйлаб “Нақшбандия пирлари” туризм ҳалқаси очилади.
Вилоятда 2,5 минг ўринга эга 53 тагина меҳмонхона бор, уларнинг ярми Термиз шаҳрида жойлашган. Келгуси йилда вилоятга сайёҳлар оқимини 3 баробар ошириш режа қилинаётгани боис, Сурхондарё тадбиркорларига меҳмонхона қуришга “юлдузи”дан қатъий назар субсидия берилиши белгиланди.
Йил якунига қадар Сариосиё аэропортида фуқаро авиацияси фаолиятини тиклаш, келгуси йилдан Сариосиёдан Самарқанд ва Тошкентга мунтазам рейсларни йўлга қўйиш, Термиздан Истанбул, Фарғона, Бухоро ва Хоразмга рейсларни кўпайтириш топширилди.
Шунингдек, Термиз—Тошкент йўналишида туристик вагон, Сариосиё —Тошкент йўналишида поезд қатнови йўлга қўйилади.
Эслатиб ўтамиз, президентнинг 2022 йилдаги “Республикада маҳаллий авиақатновларни ривожлантиришга оид қўшимча чора-тадбирлар тўғрисида”ги қарорида ҳам Сурхондарё вилоятининг туризм салоҳиятини янада ошириш мақсадида Сариосиё аэропортига авиақатновларни тиклаш белгиланганди.
Изоҳ (0)