Май ойида ички туризм учун 530 млн сўм субсидия берилди. Уларни қандай олиш мумкин?

Туризм ва маданий мерос вазирлиги ички туризм харажатларини қоплаш учун субсидия олиш тўғрисидаги аризалар қабули давом этаётганини маълум қилди. 

Субсидия саёҳат ташкилотчисининг маҳаллий туристларга Ўзбекистон бўйлаб ташкил этилган саёҳатларнинг транспорт чипталари ҳамда меҳмонхона хизматлари харажатларининг бир қисмини қоплаш учун тақдим этилади. 

Субсидия олмоқчи бўлганлар ҳар ой якуни билан кейинги ойнинг 15-санасидан кечиктирмай ариза билан ёзма ёки электрон шаклда Туризм ва маданий мерос вазирлигига мурожаат қилиши мумкин.

Аризага (ариза намунаси) қуйидаги ҳужжатлар илова қилинади:

• ариза берувчининг номи, жойлашган жойи (почта манзили), СТИР ва хизмат кўрсатувчи банкдаги ҳисобрақами реквизитлари тўғрисидаги маълумотлар;

• авиа ва темир йўл чипталари учун тўлов амалга оширилганлигини тасдиқловчи ҳужжатлар нусхалари;
• саёҳат ташкилотчилари томонидан жойлаштириш воситаларида маҳаллий туристларга кўрсатилган хизматлар учун тузилган шартномалар бўйича тўлов амалга оширилганлигини тасдиқловчи ҳужжатлар;
• туристик ваучерларнинг нусхалари ва бошқалар.  

Субсидия олиш учун келиб тушган аризаларни кўриб чиқишнинг охирги куни ойнинг 15-санаси ҳисобланади. 

Шу сабабдан саёҳат ташкилотчиларининг май ойидаги харажатлари қопланиши тўғрисидаги аризалар июнь ойининг 15-санасигача қабул қилиниши маълум қилинади.

Туризм ва маданий мерос вазирлиги томонидан 2021 йил май ойидан шу кунга қадар 72 та ариза қаноатлантирилган бўлиб, меҳмонхона ва транспорт харажатлари учун жами 530 млн сўм миқдорда субсидиялар ажратилган.

Аввалроқ Ўзбекистонда ички туризмни ривожлантиришга масъул ташкилотлар белгилангани ҳақида хабар берилган эди.