Туризм ва маданий мерос вазирлиги томонидан Андижон шаҳрида уч юлдузли меҳмонхона қурган тадбиркорга 2,5 миллиард сўм миқдорида субсидия берилди. Бу ҳақда «Дарё»га туризм ва маданий мерос бошқармаси хабар бермоқда.
Маълум қилинишича, президентнинг 2019 йил 5 январдаги «Туризм тармоғини жадал ривожлантиришга оид чора-тадбирлар тўғрисида»ги ҳамда Вазирлар Маҳкамасининг 2019 йил 27 майдаги «Меҳмонхона хўжалиги фаолиятини яна-да ривожлантириш учун қулай шарт-шароитлар яратиш чора-тадбирлари тўғрисида»ги қарорларига асосан уч юлдузли тоифа учун 50 та хонадан кам бўлмаган ва тўрт юлдузли тоифа учун 100 та хонадан кам бўлмаган хоналар фондига эга меҳмонхона 2023 йил 31 декабргача фойдаланишга топширилган тақдирда, меҳмонхона тоифаси тасдиқлангач янги меҳмонхонани қуриш ва жиҳозлаш учун инвесторлар харажатларининг бир қисми давлат бюджети маблағлари ҳисобидан қопланиши белгиланган.
Жорий йилнинг январь ойида Андижон шаҳар марказида фойдаланишга топширилган барча қулайликларга эга бўлган, 66 хонадан иборат уч юлдузли меҳмонхонани қурган тадбиркорга бинони қуриш ва жиҳозлаш учун сарфлаган харажатларини қисман қоплаш мақсадида Туризм ва маданий мерос вазирлиги томонидан 2 миллиард 640 миллион сўм миқдорида давлат бюджетидан субсидия маблағи ажратилди.
Меҳмонхона ўзига хос миллий ва замонавий дизайн асосида Европа стандартларига мос равишда жиҳозланган. Меҳмонхона бир вақтнинг ўзида 80 нафар мижозга хизмат кўрсатиш имкониятига эга.
Изоҳ (0)