Ўзбекистонда 2025 йилда ногиронлиги бўлган болаларга ижтимоий соҳа объектлари, таълим муассасаларига бориб келишларига қулайликлар яратиш мақсадида ижтимоий транспорт хизмати йўлга қўйилади. Бу ҳақда Ижтимоий ҳимоя миллий агентлиги ахборот хизмати хабар берди.
Маълум қилинишича, Вазирлар Маҳкамасининг “Транспорт хизматларидан фойдаланиш имкониятларини кенгайтириш орқали кўриш ва ҳаракатланиш билан боғлиқ касалликларга чалинган алоҳида таълим эҳтиёжлари бўлган болалар учун таълим олиш шароитларини яхшилаш тўғрисида”ги 132-сонли қарори қабул қилинди.
Қарор билан, ушбу хизматни 2025 йил 1 апрелдан Тошкент, Андижон ва Самарқанд шаҳарларида пилот лойиҳа сифатида, 2025 йилнинг якунига қадар эса республиканинг бошқа ҳудудларида босқичма-босқич жорий этиш белгиланди.
Лойиҳа доирасида транспорт хизматлари:
- ихтисослаштирилган мактаб, мактаб-интернатлари, шу жумладан, ушбу муассасалардаги “Ғамхўрлик” гуруҳларида,
- умумтаълим мактабларининг инклюзив синфларида;
- реабилитация марказига эга давлат кўп тармоқли ихтисослаштирилган мактабгача таълим ташкилотларида таълим олувчи кўриш ва ҳаракатланиш билан боғлиқ касалликларга чалинган болаларга кўрсатилади.
Хизматдан фойдаланганлик учун тўлов ва субсидия тизими ҳам жорий этилмоқда. Хусусан:
- ҳар бир йўловчига бир ойда базавий ҳисоблаш миқдорининг 1,2 бараваридан ошмайдиган миқдорда;
- Ижтимоий ҳимоя ягона реестри ёки Кам таъминланган оилалар реестрига киритилган оилалардаги йўловчилар учун ҳар бир қатнов тўловининг 100 фоизи;
- юқорида кўрсатилган реестрларга киритилмаган оилалардаги йўловчилар учун ҳар бир қатнов тўловининг 60 фоизи субсидия шаклида қопланади.
Субсидия шаклидаги тўловларни агентликнинг Ижтимоий ҳимоя давлат жамғармаси маблағлари ҳисобидан амалга оширилади.
Лойиҳа доирасида хизмат тадбиркорлик субъектлари томонидан кўрсатилади. Тадбиркорлик субъектлари учун агентлик томонидан “Ягона миллий ижтимоий ҳимоя” АТ да электрон шаклда юритиладиган Транспорт хизматини кўрсатувчи тадбиркорлик субъектлари реестри шакллантирилади. Транспорт хизматидан фойдаланиш бўйича буюртмалар реестрдаги тадбиркорлик субъектларининг мобил иловалари орқали берилади. Транспорт хизматининг ўз вақтида ва сифатли кўрсатилишини агентлик ҳузуридаги “Ахборот технологиялари маркази” Call-маркази томонидан мониторинг қилинади.
Шунингдек, мазкур қарор билан тасдиқланган низомга мувофиқ йўловчиларни ижтимоий аҳамиятга эга транспорт хизматидан фойдаланувчилар рўйхатига киритиш бўйича мурожаат қилишнинг Ягона интерактив давлат хизматлари портали орқали жорий этилади ва ушбу мурожаатларни кўриб чиқилишининг ташкилий-бошқарув имкониятини яратилади.
Агентлик “Ижтимоий такси” пилот лойиҳаси амалга оширилиши ҳақида 2024 йилнинг март ойида маълум қилганди. 2024 йилнинг ноябрида ногиронлиги бўлган шахслар учун “Ижтимоий такси” пилот лойиҳаси Тошкент шаҳрида ишга тушганди.
“Ногиронлиги бўлган болаларга ижтимоий хизмат ва ёрдам кўрсатиш тизимини янада такомиллаштириш бўйича қўшимча чора-тадбирлар тўғрисида”ги президент қарорига кўра, 2025 йил 1 мартдан тажриба-синов тариқасида босқичма-босқич Қорақалпоғистон Республикаси, Андижон, Қашқадарё, Самарқанд, Сурхондарё ва Тошкент вилоятлари ҳамда Тошкент шаҳрида, 2025 йил 1 октябргача республиканинг қолган ҳудудларида 3 ёшдан 18 ёшгача ногиронлиги бўлган болалар учун давлат-хусусий шериклик асосида кундузги парвариш хизмати йўлга қўйилади.
“Ногиронлиги бўлган шахсларга қулай ва тўсиқларсиз муҳит яратиш бўйича қўшимча чора-тадбирлар тўғрисида”ги президент қарорига кўра 2026 йил 1 январгача ногиронлиги бўлган шахсларнинг ҳаракатланиши учун республиканинг барча ҳудудларини қамраб олувчи тўсиқларсиз муҳит яратилган объектларни аниқлаш имконини берувчи “Интерактив харита” ахборот тизими ишга туширилади.
Изоҳ (0)