Сингапурда гиёҳванд модда сотган эркак қатл этилди. БМТ бунга норозилик билдирди

Сингапурда каннабис савдоси билан шуғулланган эркак қатл қилинди, деб хабар бермоқда DW нашри.

Тransformative Justive Collective ташкилоти фаоли Кирстен Хан қатл амалга оширилганини ва марҳумнинг оиласи ўлим гувоҳномасини олганини тасдиқлади.

“46 ёшли сингапурлик Тангаражу Суппиа бугун Чанги қамоқхонасида қатл этилди”, — дейилади 25 апрель куни берилган хабарда

Тангаражу Суппиа 2017 йилда 1017,9 грамм каннабиснинг “ноқонуний савдосига кўмаклашиш”да айбдор деб топилган, бу миқдор ўлим жазоси қўлланилиши керак бўлган минимал даражадан икки баравар кўп. 2018 йилда у ўлимга ҳукм қилинган, Апелляция суди бу қарорни ўз кучида қолдирган.

Маълумот ўрнида Сингапурда гиёҳвандликка доир дунёдаги энг оғир қонунлар мавжуд. Қонунда айтилишича, ўлим жазоси ноқонуний наркосавдога қарши самарали тўхтатувчи восита бўлиб қолмоқда.

Бироқ Бирлашган Миллатлар Ташкилотининг Инсон ҳуқуқлари бўйича Олий комиссари бошқармаси бунга қўшилмайди.

“Ўлим жазоси кам сонли мамлакатларда ҳамон қўлланилмоқда. Бу жиноят содир этилишидан энг кўп сақлайди, деган афсона мавжуд. Биз тегишли жараён ва адолатли суд кафолатлари ҳақида хавотирдамиз. БМТнинг Инсон ҳуқуқлари бўйича идораси расмийларни бу жазонинг ижросигача бормасликка чақиради”, — дейди муассаса баёнотида.

БМТнинг инсон ҳуқуқлари бўйича брифингида матбуот котиби Равина Шамдасани Сингапур ҳукуматини гиёҳванд моддалар билан боғлиқ жиноятлар учун қатлларга “расмий мораторий” жорий этишга чақирди.

Аввалроқ, Женевада жойлашган Гиёҳвандлик сиёсати бўйича глобал комиссия аъзоси британиялик миллиардер Ричард Бренсон ҳам Сингапурни Тангаражунинг қатл этилишини тўхтатишга чақирган эди.

Бунга жавобан Сингапур Ички ишлар вазирлиги Тангаражунинг айби ҳеч бир шубҳасиз исботланганини маълум қилди.

“Брансон бу баёнотлари билан Сингапур судьялари ва бизнинг жиноий адлия тизимимизга ҳурматсизлик кўрсатди”, — дея қўшимча қилган вазирлик.