Бирлашган Миллатлар Ташкилоти (БМТ) хабар беришича, COVID-19 туфайли жорий этилган локдаунлар мунтазам равишда каннабис истеъмол қилишнинг ортишига олиб келган, бу эса депрессия ва ўз жонига қасд қилиш хавфини оширган. Бу ҳақда Reuters хабар берди.
БМТнинг Гиёҳванд моддалар ва жиноятчилик бўйича бошқармасининг Гиёҳванд моддалар бўйича глобал ҳисоботида таъкидланишича, каннабис узоқ вақтдан бери дунёда энг кўп қўлланиладиган наркотик бўлиб келган ва ундан фойдаланиш ортиб бормоқда.
2012 йилда Вашингтон ва Колорадодан бошлаб АҚШнинг турли штатлари каннабисдан тиббий бўлмаган мақсадларда фойдаланишни қонунийлаштирган. Уругвай буни 2013 йилда, Канада 2018 йилда қонунийлаштирган. Бошқа давлатлар ҳам худди шундай қадамлар қўйган, бироқ ҳисоботда асосий эътибор шу уч давлатга қаратилган.
«Каннабиснинг қонунийлаштирилиши гиёҳванд моддаларни кундалик истеъмол қилиш ҳақидаги ҳисоботларда ўсиш тенденциясини тезлаштирган кўринади. Ўсмирлар орасида каннабисдан фойдаланиш кўрсаткичи деярли ўзгармаган бўлса-да, ёшлар орасида кучли таъсир қилувчи маҳсулотлардан фойдаланиш кўпайган», — дейилади ташкилот ҳисоботида.
Ҳисоботда айтилишича, 2020 йилда тахминан 284 миллион киши (дунё аҳолисининг 5,6 фоизи) героин, кокаин, амфетамин ёки экстази каби гиёҳванд моддаларни истеъмол қилган. Улардан 209 миллион киши каннабис истеъмол қилган.
«COVID-19 пандемияси давридаги локдаунлар 2020 йилда каннабис истеъмолининг кўпайишига ёрдам берди. Каннабис истеъмоли билан боғлиқ руҳий касалликлар ва ўз жонига қасд қилишлар улуши ошди», — дейилади ҳисоботда.
Унга кўра, 2020 йилда кокаин ишлаб чиқариш рекорд даражага етган, шунингдек, 2021 йилги маълумотларга кўра, гиёҳванд моддаларнинг иккита асосий бозори — Шимолий Америка ва Европадан Африка ва Осиёга кенгайган.
Опиоидлар энг ҳалокатли наркотик бўлиб қолмоқда, фентанил эса АҚШда дозани меёридан ошириш оқибатидаги ўлим бўйича янги рекордга олиб келди: 2021 йилда тахминий ҳисоб-китобларга кўра 107 622 киши шу сабаб билан вафот этган.
Изоҳ (0)