Тожикистонда фолбинлик ва сеҳргарлик билан шуғулланган эркак ҳамда унга мурожаат қилган аёллар қўлга олинди. Бу ҳақда Душанбе шаҳар ички ишлар бошқармаси хабар берди.
Душанбеда 70 ёшли эркак ноқонуний фаолият — фолбинлик ва сеҳргарлик билан шуғулланганликда гумонланиб ушланган. У одамларни ўз уйида қабул қилиб, пул мукофоти эвазига фолбинлик хизмати кўрсатган. Тергов жараёнида у бундай хатти-ҳаракатлардан мунтазам равишда молиявий фойда кўргани аниқланган.
Унга нисбатан Тожикистон Маъмурий жавобгарлик тўғрисидаги кодексининг 482-моддаси билан маъмурий баённома расмийлаштирилган.
Эркакдан ёрдам сўраб мурожаат қилган икки аёл ҳам милицияга олиб келинган. Душанбе шаҳар Ички ишлар бошқармаси фуқароларга сеҳр-жоду ва фолбинлик билан шуғулланувчиларга мурожаат қилмасликни, бундай ҳолатлар ҳақида эса ички ишлар органларига хабар беришни эслатмоқда.
Тожикистонда фолбинлик қилганлар жиноий жавобгарликка тортилади
Амалдаги қонунчиликка кўра, Тожикистонда маъмурий жазо қўлланилганидан сўнг бир йил ичида фолбинлик ёки сеҳргарлик билан қайта шуғулланилса, жиноят иши қўзғатилади. Аммо тегишли модда бўйича қандай жазо чораси қўлланилиши аниқ кўрсатилмаган.
Эндиликда, жодугарлик ва фолбинлик учун белгиланган жарима миқдори оширилмоқда, шунингдек, маъмурий қамоқ жазосини ҳам қўллаш кўзда тутилмоқда. Депутатлар ҳозирча жарима миқдори ёки қамоқ муддати ҳақида аниқ маълумот бермаган.
Аввалги тартибга кўра, Маъмурий жавобгарлик кодексининг 482-моддаси асосида фолбинлик билан шуғулланган шахсларга ҳисоблаш кўрсаткичининг 40–50 баробари (2024 йил 16 май курси бўйича 1 баробар 70 сомоний — 81 минг сўм) миқдорида жарима белгиланган эди. Қоидабузарлик такрорланса, бу кўрсаткич 60–100 баробаргача оширилиши мумкин.
Изоҳ (0)