Тожикистон Жиноят кодексига жодугарлик ва фолбинлик билан шуғулланиш бўйича модда киритилди. Бу ҳақда мамлакат парламентининг расмий нашри “Садои мардум” хабар берди.
Янги 240-моддага (Жодугарлик ва фолбинлик қилиш) кўра, маъмурий жазо қўлланган кундан бошлаб бир йил ичида қайта сеҳр-жоду ва фол очиш билан шуғулланилса, жиноий жавобгарлик белгиланади. Бироқ тегишли моддада қандай жазо назарда тутилганига аниқлик киритилмаган.
Шунингдек, Маъмурий жавобгарлик тўғрисидаги кодексда шунга ўхшаш модда қайта кўриб чиқилган. Хусусан, энди жодугарлик ва фолбинлик учун жарима миқдори оширилади ва муқобил жазо сифатида маъмурий қамоқ жазоси берилади. Депутатлар жарима миқдори ёки қамоқ муддати борасида ҳам аниқ маълумот бермаган.
Аввалроқ Тожикистонда жодугарлик ва фолбинлик билан шуғулланганлик учун жазо (Маъмурий ҳуқуқбузарлик тўғрисидаги кодексининг 482-моддаси) ҳисоб кўрсаткичининг 40 дан 50 баробаригача (16 май кунги курс бўйича 1 баробар 70 сомоний — 81 минг сўм) жарима назарда тутилганди. Қоидабузарликлар такрорланган тақдирда жарима миқдори ҳисоб кўрсаткичининг 60-100 бараваригача оширилиши мумкин эди.
Тожикистон расмийлари бу йил жодугарларга қарши курашишни эълон қилди. Апрель ойида Ички ишлар вазирлиги табиблар ва сеҳргарлар 6 ойгача мажбурий меҳнатга мажбурланишини маълум қилганди.
Изоҳ (0)