Тожикистонда фолбинга борганлар ҳам жазоланади

Тожикистон Ички ишлар вазирлиги мамлакатда жодугарлик ва фолбинликка қарши курашишнинг янги усулини эълон қилди.

Эндиликда нафақат жодугар ва фолбинлар, балки уларга мурожаат қилаётган фуқароларга нисбатан ҳам чора кўради.

“Ўтказилган тезкор-профилактик тадбирлар натижасида фолбин ва жодугарларга мурожаат қилаётган фуқаролар уларнинг хизматларини тўлаб, бу фаолиятни ривожлантираётгани аниқланди”, дейилади вазирлик хабарида.

Биргина июль ойида вазирликда 150 дан ортиқ шундай шахс рўйхатга олинган ва уларга нисбатан қонунга мувофиқ чоралар кўрилади.

“Сеҳргарлик хизматлари сўраб мурожаат қилган барча шахслар ИИВнинг ҳудудий органларига чақирилади, уларга нисбатан тегишли баённомалар тузилиб, маълумотлари ва фотосуратлари идора маълумотлар базасига киритилади”, дея таъкидланади вазирлик хабарида.

Сўнгги пайтларда Тожикистонда фолбинларни аниқлаш бўйича мунтазам рейдлар ўтказилмоқда. Шунга қарамай, уларнинг хизматидан фойдаланувчилар сони ҳамон сезиларли даражада юқори. Душанбеда йил бошидан буён сеҳргарлик билан шуғулланувчи 141 киши ушланган.

Фолбин ва сеҳргарлар қандай жазоланади?

Тожикистонда фол очиш ва жодугарлик билан шуғулланганларга ҳисоб-китоб кўрсаткичининг 80 бараваридан 100 бараваригача миқдорда жарима белгиланади ёки 10 кундан 15 кунгача маъмурий қамоқ жазоси тайинланади. Бир йил давомида такрор содир этилган тақдирда, жиноят иши қўзғатилиши белгиланган. Фолбинлар ҳисоб-китоб учун 1500 дан 2000 гача жарима ёки бир йилдан икки йилгача озодликдан маҳрум қилиш билан жазоланади.

Тожикистонда сеҳргарлик учун маъмурий жавобгарлик 2008 йилда жорий қилинган, 2015 йилдан бошлаб эса сеҳр-жоду маросимларини ўтказганлик учун 7 йилгача озодликдан маҳрум этиш кўринишидаги жиноий жазо белгиланган.