Тожикистонда фолбинлик ва жодугарлик билан шуғулланувчиларга қарши кураш доирасида улар учун мажбурий меҳнат жорий этиш тўғрисида қарор қабул қилинди. Бу ҳақда Тожикистон Ички ишлар вазирлиги хабар берди.
Маъмурий қонун ҳужжатларига киритилиши режалаштирилган ўзгартиришларга кўра, сеҳргарлар, фолбинлар, шунингдек, қонунга хилоф равишда диний таълимот олиб бораётган шахслар 6 ойгача бўлган муддатга мажбурий меҳнатга тортилиши мумкин.
Ушбу чора-тадбирлар оккултизм соҳасидаги жиноий ҳаракатларга қарши янада самаралироқ курашиш ва мамлакатда жамоат тартибини сақлашга қаратилган, — дейилади вазирлик хабарида.
Полиция маълумотларига кўра, мамлакатда бу каби одатларнинг кенг тарқалиши сабаблардан бири айрим фуқароларнинг ислом шариати тавсиялари ва ҳуқуқий меъёрларга эътибор бермаётганидир.
Айни пайтда мамлакат қонунчилигида жодугарлик ва фолбинлик билан шуғулланганлик учун жазо (маъмурий ҳуқуқбузарлик тўғрисидаги кодексининг 482-моддаси) ҳисоб кўрсаткичининг 40 дан 50 баробаригача (1 баробар 70 сомоний – 71 минг сўм) жарима назарда тутилган. Қоидабузарликлар такрорланган тақдирда жарима миқдори ҳисоб кўрсаткичининг 60-100 бараваригача оширилиши мумкин.
Изоҳ (0)