Тожикистон Ички ишлар вазирлиги республика президенти Эмомали Раҳмон топшириғига кўра оккультацион амалиётлар тарқалишига қарши йирик рейд ўтказди.
Рейд давомида “жодугарлик ва фолбинлик” билан шуғулланган 1,5 минг киши қўлга олинди.
“Уларнинг барчаси рўйхатга олинди”, дейди президент.
Раҳмонга кўра, рейд давомида расмий диний маълумотга эга бўлмаган 5 мингдан ортиқ дин пешволари ҳам қўлга олинган.
Аввалроқ Тожикистон президенти диний арбоблар билан учрашувда мамлакатда оккультизм амалиётлари кенг тарқалаётганини эълон қилган ва уларга қарши курашишга чақирган эди. Унинг сўзларига кўра, бу “мамлакатни хурофотга етакламоқда”.
Апрель ойида Тожикистон Ички ишлар вазирлиги қонунчиликка ўзгартиришлар киритилганини эълон қилган эди. Унга кўра, табиблар, фолбинлар, сеҳргарлар ва тумор ишлаб чиқарувчилар ниқоби остида фирибгарлик ҳамда одамларни алдаганлик учун олти ойгача мажбурий меҳнат назарда тутилган.
Шунингдек, фолбин ва сеҳргарлар хизматидан фойдаланувчи фуқароларнинг махсус реестри ташкил этилгани ҳақида ҳам маълум қилинган. Вазирлик август ойида реестрга аллақачон 150 дан ортиқ киши киритилганини маълум қилган.
Изоҳ (0)