Tojikistonda folbinlik va sehrgarlik bilan shug‘ullangan erkak hamda unga murojaat qilgan ayollar qo‘lga olindi. Bu haqda Dushanbe shahar ichki ishlar boshqarmasi xabar berdi.
Dushanbeda 70 yoshli erkak noqonuniy faoliyat — folbinlik va sehrgarlik bilan shug‘ullanganlikda gumonlanib ushlangan. U odamlarni o‘z uyida qabul qilib, pul mukofoti evaziga folbinlik xizmati ko‘rsatgan. Tergov jarayonida u bunday xatti-harakatlardan muntazam ravishda moliyaviy foyda ko‘rgani aniqlangan.
Unga nisbatan Tojikiston Ma’muriy javobgarlik to‘g‘risidagi kodeksining 482-moddasi bilan ma’muriy bayonnoma rasmiylashtirilgan.
Erkakdan yordam so‘rab murojaat qilgan ikki ayol ham militsiyaga olib kelingan. Dushanbe shahar Ichki ishlar boshqarmasi fuqarolarga sehr-jodu va folbinlik bilan shug‘ullanuvchilarga murojaat qilmaslikni, bunday holatlar haqida esa ichki ishlar organlariga xabar berishni eslatmoqda.
Tojikistonda folbinlik qilganlar jinoiy javobgarlikka tortiladi
Amaldagi qonunchilikka ko‘ra, Tojikistonda ma’muriy jazo qo‘llanilganidan so‘ng bir yil ichida folbinlik yoki sehrgarlik bilan qayta shug‘ullanilsa, jinoyat ishi qo‘zg‘atiladi. Ammo tegishli modda bo‘yicha qanday jazo chorasi qo‘llanilishi aniq ko‘rsatilmagan.
Endilikda, jodugarlik va folbinlik uchun belgilangan jarima miqdori oshirilmoqda, shuningdek, ma’muriy qamoq jazosini ham qo‘llash ko‘zda tutilmoqda. Deputatlar hozircha jarima miqdori yoki qamoq muddati haqida aniq ma’lumot bermagan.
Avvalgi tartibga ko‘ra, Ma’muriy javobgarlik kodeksining 482-moddasi asosida folbinlik bilan shug‘ullangan shaxslarga hisoblash ko‘rsatkichining 40–50 barobari (2024-yil 16-may kursi bo‘yicha 1 barobar 70 somoniy — 81 ming so‘m) miqdorida jarima belgilangan edi. Qoidabuzarlik takrorlansa, bu ko‘rsatkich 60–100 barobargacha oshirilishi mumkin.
Izoh (0)