Машҳур испаниялик актриса Санта-Барбарадаги Халқаро кинофестивалда нуфузли мукофотга сазовор бўлди. Педро Алмодовар режиссёрлигидаги «Параллел оналар» фильмидаги энг яхши аёл роли учун Академия мукофотига номзод бўлган Пенелопа Крус ҳам дунё бўйлаб юз бераётган муҳим нарсалар ҳақида гапириш имкониятидан фойдаланди.
Актриса статуэткани олар экан, барчанинг эътиборини бутун дунёдаги ва хусусан, Украинадаги аёлларнинг даҳшатли аҳволига қаратишини зарур деб ҳисоблади.
«Мен фарзандини йўқотишдан қўрққан аёлларни жуда яхши тушунаман. Дунёда қанчалаб аёллар катта синов ҳамда даҳшатларга дуч келмоқда. Бугун менинг юрагим ва хаёлим Украина аёлларида, барча болалар ва эркакларида ҳамда бу даҳшатли вазиятдан азият чекаётганларда», – деди актриса.
2022 йил Санта Барбара Халқаро кинофестивали Украинага ёрдам бериш учун Direct Релиэф билан ҳамкорлик қилмоқда. Россиянинг Украинага қарши ҳарбий тажовузидан жабрланганларни қўллаб-қувватлаш учун маблағ йиғиш ишлари давом этяпти.
Актрисанинг ўзи ҳам Instagram’да Украинадаги урушдан жабр кўрганларга ёрдам бериш мавзусида муҳим постларни эълон қилди.
https://www.instagram.com/p/Ca6KQX5AL6j/
Эслатиб ўтамиз, аввалроқ Голливуд юлдузи Кейт Блашетт бутун дунёни украиналик муҳожир ва қочқинларга ёрдам беришга чақириб, видео мурожаат йўллади. Шунингдек, Голливуд юлдузлари Райан Рейнолдс ва Блейк Лайвли украиналик қочоқлар учун миллион доллар хайрия қилди. Шунингдек, жаҳонга машҳур актриса Анжелина Жоли ҳам Украинадаги вазиятга муносабат билдириб, тинч аҳолига ёрдам беришини маълум қилганди. Актриса узоқ вақтдан бери БМТнинг яхши ният элчиси сифатида бутун дунё бўйлаб қочқинларни қўллаб-қувватлаб келади.
Мавзуга доир: Дэвид ва Виктория Бекҳэм украиналик болаларга ёрдам бериш учун хайрия акциясини бошлади
Изоҳ (0)