Машҳур британиялик жуфтлик Украина ва Россия ўртасидаги урушда жабр кўрган болалар учун хайрия акциясини бошлади.
Кўплаб жаҳон юлдузлари Украина халқига нафақат ижтимоий тармоқлардаги ҳамдардлик хабарлари билан, балки молиявий жиҳатдан ҳам ёрдам беришга қарор қилди.
Мисол учун, британиялик ёзувчи Жоан Роулинг украиналик болаларга ёрдам бериш учун миллион доллардан ортиқ хайрия қилди. Бу ташаббусга яна бир машҳур британиялик, яъни Бекҳэм жуфтлиги қўшилди.
Дэвид Бекҳэм ўзининг Instagram’даги саҳифасида Украина болалари учун маблағ йиғиш ҳақида видео жойлади:
Оналар фарзандлари билан қочишга мажбур. Оилалар ажралган. Ётоқларидан айрилган болалар бир кечада қочқинга айланди. Украинадаги низонинг иккинчи ҳафтаси давом этар экан, оилаларнинг эҳтиёжлари ошиб бормоқда ва айни пайтда 7,5 миллион бола хавф остида.Украиналик оилаларга ёрдам бериш учун спортчи UNICEF хайрия жамғармаси билан биргаликда маблағ йиғиш ташаббуси билан чиқди.
https://www.instagram.com/tv/Ca1xzXVIiQx/?utm_source=ig_web_copy_link
Шунингдек, Дэвид Бекҳэмнинг рафиқаси Виктория ижтимоий тармоқдаги саҳифасида украиналик қочқинларга ёрдам берадиган барча халқаро жамғармалар номи ёзилган пост жойлади.
«Бугун, Халқаро хотин-қизлар кунида мен ҳозирда бизнинг ёрдамимизга энг муҳтож бўлган, Украинадаги ҳалокатли урушдан жабр кўрган аёллар ва болаларни қўллаб-қувватлаш имкониятидан фойдаланмоқчиман», — деб ёзади Виктория.
Эслатиб ўтамиз, Голливуд юлдузлари Райан Рейнолдс ва Блейк Лайвли украиналик қочоқлар учун миллион доллар хайрия қилганди. Шунингдек, жаҳонга машҳур актриса Анжелина Жоли ҳам Украинадаги вазиятга муносабат билдириб, тинч аҳолига ёрдам беришини маълум қилган. Актриса узоқ вақтдан бери БМТнинг яхши ният элчиси сифатида бутун дунё бўйлаб қочқинларни қўллаб-қувватлаб келади.
Изоҳ (0)