Шимолий Корея етакчиси Ким Чен Иннинг синглиси, Корея Меҳнат партияси тарғибот ва ташвиқот бўйича директор ўринбосари Ким Ё Чжон Жо Байденнинг агар АҚШ ёки унинг иттифоқчиларига ядровий зарба берилса, КХДРда Ким Чен Ин “режими тугатилиши” ҳақидаги таҳдидларини бемаънилик деб атади.
У Байденни “эртаси йўқ қария” деб атади ҳамда унинг АҚШ “хавфсизлиги ва келажаги учун жавобгарликни ўз зиммасига олишга” қодир эмаслигини айтди.
“Эътибордан четда қолдириб бўлмайдиган яна бир факт шуки, душман давлатнинг бош қўмондони бутун дунё олдида очиқ ва тўғридан тўғри ‘режим тугатилиши’ иборасини ишлатмоқда. Буни кекса одамнинг аҳмоқлиги деб ҳисоблаш мумкинми?” — деди Ким Ё Чжон.
Бир неча кун олдин Байден Жанубий Корея президенти Юн Сок Ёл билан музокаралар якунлари бўйича брифингда АҚШ ёки унинг иттифоқчиларига ядровий зарба бериш номақбул экани ва бунга қўл урадиган ҳар қандай режим тугатилишини айтганди.
Бунгача Ким Чен Иннинг синглиси АҚШни Тинч океанидаги синовлар чоғида Шимолий Кореянинг қитъалараро ракетасини уриб туширса, бунинг оқибатларидан огоҳлантирган ҳамда Пхеньян буни уруш эълон қилиш деб ҳисоблашини айтган эди.
Март ойи ўрталарида Ким Чен Ин Шимолий Корея “ядрога ядро билан жавоб беради, очиқ қарама-қаршиликка, шундай қарама-қаршилик кўрсатади” деб таҳдид қилганди.
Эслатиб ўтамиз, 14 апрель куни Шимолий Корея биринчи марта “Хвасон-18” қитъалараро баллистик ракетасини учирган эди. Ким Чен Ин бу синов “мамлакатнинг душман ҳужумига ядровий зарба беришга тайёрлигини ошириши” ва “стратегик тийиб турувчи кучлар таркибини тубдан қайта қуриш” имконини беришини таъкидлаган.
“Хвасон-18” учирилганидан кейин Жанубий Корея, АҚШ ва Япония ҳарбийлари Япон денгизида ракетага қарши мудофаа машғулотларини бошлади.
Изоҳ (0)