Жанубий Корея Миллий разведка хизмати (НИС) айрим ОАВларнинг КХДРда давлат тўнтариши содир этилгани тўғрисида хабарларини рад этди, деб хабар беради «Интерфакс».
Маълум қилинишича, Миллий разведка хизмати Шимолий Корея етакчисининг синглиси Ким Ё Чжон давлат тўнтаришидан сўнг Ким Чен Инни ҳокимиятдан ағдаргани таъкидланган хабарларни рад этган.
Яна бир ҳукумат амалдори Yonhap агентлигига ушбу маълумотлар ҳақиқатга мос келмаслигини билдирган.
Агентликнинг эслатишича, қатор ОАВлар Американинг Globe таблоидига таяниб, Ким Ё Чжон 6 май—5 июнь кунлари давлат тўнтаришини амалга ошириб, Ким Чен Инни ҳокимиятдан кетказгани ҳақида ёзган. Хабарларда КХДРда ўтказилган яқиндаги тадбирларда Шимолий Корея етакчисига ўхшаш инсон иштирок этгани таъкидланган.
ОАВлар бу каби даъволарини Ким Чен Иннинг ташқи кўриниши ўзгаргани билан изоҳлаган. Хусусан, қайд этилишича, айни вақтларда КХДР етакчиси сезиларли даражада озган.
Эслатиб ўтамиз, июнь ойининг охирида КХДР давлат матбуоти мамлакат раҳбарининг вазн йўқотганини расман тан олганди. Шунингдек, Жанубий Корея нашрларида қайд этилишича, унинг бўйи 170 сантиметрни, вазни 140 килограммни ташкил этган, бу 30-40 ёшли одамлар учун меъёрдан ошиқ бўлиб, қандайдир касаллик мавжудлигидан далолат бериши мумкин.
Кимнинг соғлиғи юзасидан оммага камдан кам бериладиган изоҳлар июнь ойининг бошида хорижий таҳлилчилар КХДР етакчиси озиб кетганини қайд этганидан кейин пайдо бўлди. Ким Чен Иннинг соғлиғи ҳақидаги миш-мишлар 2020 йил бошида кучайган.
Август бошида Ким Чен Иннинг бошидаги доғлар унинг соғлиғи ҳақида яна бир мунозарага сабаб бўлганди. Сентябрда эса интернетда Шимолий Корея раҳбарининг фото ва видеотасвирлари у Пхеньяндаги «қийин ва мураккаб» соҳаларда ишлаш учун «кўнгилли равишда» даъвогар бўлиб чиққан талабалар ва мактаб ўқувчилари билан учрашув ўтказганидан сўнг пайдо бўлди.
Изоҳ (0)