Шимолий Корея етакчиси Ким Чен Ин қизи Ким Чже Э билан бирга артиллерия машғулотларига раҳбарлик қилди. Машғулотлар давомида “ғарбий фронтдаги” душманнинг шартли аэродромига ҳужум қилиш сценарийси ишлаб чиқилди. Бу ҳақда Корея марказий ахборот агентлиги (KCNA) хабарида айтилади.
Ҳарбий қисм ва дивизия элементларини кўздан кечирар экан, Шимолий Корея раҳбари “урушга тайёргарликнинг ҳақиқий ҳолати ва аскарларнинг хизмат муддати билан батафсил танишган”. Хабарда айтилишича, Ким Чен Ин “машғулот натижаларидан катта мамнуният изҳор этган” ва “артиллерия қўшинларининг кучли ва қатъий тайёргарлигини юқори баҳолаган”.
У КХДР раҳбарияти “душманнинг урушга турли даражада тайёргарлик кўраётганидан доим хабардор”лигини қўшимча қилган.
Март ойида Шимолий Корея етакчисининг синглиси Ким Ё Чжон агар АҚШ Шимолий Кореянинг Тинч океанида синовдан ўтказадиган қитъалараро ракетасини уриб туширишга уринса, Пхенян буни уруш эълон қилиниши деб баҳолашини айтганди. Шунингдек, Шимолий Корея ташқи ишлар вазирининг халқаро ташкилот бўйича ўринбосари Ким Сон Ген БМТни АҚШ ва Жанубий Кореядан қўшма ҳарбий машғулотларни тўхтатишни талаб қилишга чақирган.
Сўнгги ойларда КХДР раҳбари қизи Ким Чже Эни кўплаб ижтимоий-сиёсий тадбирларга олиб бормоқда: масалан, февраль ойининг ўрталарида улар бирга спорт мусобақаларида қатнашди, ой бошида эса Ким Чен Ин рафиқаси ва қизи билан Корея халқ армиясининг 75 йиллигига бағишланган тантанага ташриф буюрди.
Изоҳ (0)