Шимолий Корея 4 октябрь куни эрталаб Кореялараро алоқа каналларининг барчаси тикланишини маълум қилди. Бу ҳақда Шимолий Корея Марказий телеграф агентлигига таяниб, «РИА Новости» хабар берди.
Маълум бўлишича, бу ташаббус дастлаб Шимолий Корея раҳбари Ким Чен Ин томонидан илгари сурилган. Жанубий Корея эса уни қўллаб-қувватлаган.
«Тегишли идоралар унинг (Ким Чен Иннинг) ниятига мувофиқ, 4 октябрь куни соат 09.00 дан (Тошкент вақти билан 5:00) бошлаб барча алоқа линияларини тиклашга қарор қилди», — дейилади Марказий телеграф агентлиги хабарида.
Расмий агентлик тарқатган КХДР позициясига кўра, Жанубий Корея ҳукумати «Шимол ва Жануб ўртасидаги муносабатларни яхшилаш учун ижобий ҳаракатларни амалга ошириши зарур». КХДР, шунингдек, қўшниларини «алоқа линияларини тиклаш муҳимлигини» унутмасликка чақирди.
Аввалроқ Жанубий Корея президенти Мун Чже Ин БМТ Бош ассамблеясининг 76-сессиясида нутқи сўзлар экан икки Корея ўртасида уруши тугаганини эълон қилишни яна бир бор таклиф қилганди. Унинг фикрича, Хитой ва АҚШ шартнома тузилишига ёрдам бериши керак. Вашингтон бу масалани ўрганиш устида иш бошлаганини билдирган.
Аммо КХДР Ташқи ишлар вазирлиги Жанубий Корея билан уруш тугаганини эълон қилишга ҳали эрта эканини айтди.
Кейинроқ Корея Меҳнат партияси марказий қўмитаси бўлим мудири ўринбосари, Шимолий Корея раҳбарининг синглиси Ким Е Чжон Пхеньян Сеул билан Кореялараро урушнинг расман тугагани тўғрисида конструктив мулоқотга тайёр эканини маълум қилди. Қайд этилишича, у Жанубий Корея президенти Мун Чже Иннинг Корея уруши тугаганини эълон қилиш ҳақидаги таклифини «қизиқарли ва яхши ғоя» деб билишини айтган.
«Жанубий Корея душманлик қилмаса, бизга нисбатан иғво қўзғатмаса, қўш стандартлар билан ўжарлик кўрсатмаса, ҳаммадан ва ҳамма нарсадан айб қидиришини ўтмишда қолдирса, буёғига ҳар бир сўзи ва ҳаракати ҳақида олдиндан ўйласа, биз доимий яқин мулоқотда Кореялараро алоқаларни тиклаш ва ривожлантириш истиқболларини конструктив муҳокама қилишга тайёрмиз», — деди Ким Ё Чжон.
Икки Корея уруши уч йилдан кўпроқ давом этган — 1950 йил июнь ойининг охиридан 1953 йил июль ойининг охиригача, лекин тинчлик шартномаси ҳали расман имзоланмаган. Унда КХДР томонидан СССР ва Хитой иштирок этган, Жанубий Кореяга АҚШ, Буюк Британия, Франция, Голландия ва бошқа Ғарб давлатлари ёрдам берган.
Июль ойида Жанубий Корея президенти Мун Чже Ин ва КХДР етакчиси Ким Чен Ин Сеул ва Пхеньян ўртасида тўғридан-тўғри алоқа линиясини қайта тиклашга келишиб олганди.
Изоҳ (0)