Шимолий Корея Меҳнат партияси Марказий қўмитаси бўлим мудири ўринбосари, КХДР етакчисининг синглиси Ким Ё Чжон Жанубий Корея билан ҳарбий қарама-қаршилик юзага келган тақдирда, мамлакатнинг ядровий кучлари «ўз вазифасини бажаришини» маълум қилди. Унинг баёноти Корея марказий телеграф агентлиги томонидан эълон қилинган.
«Жанубий Корея биз билан ҳарбий зиддиятни танлайдиган бўлса, ядровий жанговар кучларимиз, шубҳасиз, ўз вазифасини бажаради», — дейди Ким Ё Чжон.
Меҳнат партияси Марказий қўмитаси бўлим мудири ўринбосарининг таъкидлашича, агарда Жанубий Корея КХДРга қарши бирор-бир ҳарбий ҳаракатларни қўлламайдиган бўлса, у «ҳужум нишони сифатида кўриб чиқилмайди».
1 апрель куни Жанубий Корея мудофаа вазири Со Ук Пхеньян Сеулга қарши ракеталарини йўналтирса, республика Қуролли кучлари КХДРнинг қўмондонлик объектлари ва ракета учириладиган жойларига зарба бера олишини маълум қилганди. Шимолий Корея Меҳнат партияси Марказий қўмитасининг котиби Пак Чон Чхон бунга жавобан, агар олдиндан зарба берилса, КХДР Жанубий Кореядаги асосий нишонларни «шафқатсизларча» йўқ қилишини айтган.
Аввалроқ Шимолий Корея минтақадаги АҚШ ҳарбийлари ҳамда уларнинг «вассал кучлари»ни кузатиш ва уларга оид маълумотларни тўплаш мақсадида сунъий йўлдош яратиши маълум бўлганди.
Изоҳ (0)