Корея Меҳнат партияси марказий қўмитаси бўлим бошлиғининг ўринбосари, Шимолий Корея етакчиси Ким Чен Иннинг синглиси Ким Ё Чжоннинг лавозими кўтарилгани айтилмоқда. Бу ҳақда Шимолий Корея расмий ОАВларига таяниб, Жанубий Кореянинг Yonhap агентлиги хабар берди.
Шимолий Корея марказий телеграф ахборот агентлигидаги мамлакатнинг аввалги етакчиси Ким Чен Ир вафотининг 10 йиллигига бағишланган хабарларда Ким Ё Чжон Шимолий Корея Меҳнат партияси Марказий Қўмитаси Сиёсий бюросининг саккиз нафар амалдаги аъзолари қаторида тилга олинган. Шу сабабли Yonhap Шимолий Корея етакчисининг синглиси Сиёсий бюро аъзоси ёки депутат этиб тайинланганини тахмин қилмоқда.
Бундан ташқари, хотирлаш маросимидан телетранслация давомида Ким Ё Чжон Сиёсий бюронинг уч нафар аъзоси билан ёнма-ён тургани кўрсатилган.
Ким Ё Чжон Шимолий Корея етакчисининг синглиси. У кўпинча Ким Чен Иннинг вориси сифатида тилга олинади, айниқса акасининг соғлиғи билан боғлиқ муаммолар ҳақида миш-мишлар пайдо бўлганда бу мавзуда кўп гапирилган.
Ким Чен Ин ҳали қирқ ёшга ҳам кирмаган. У 2011 йилда, отаси Ким Чен Ирнинг вафотидан сўнг КХДР бошқарувини қўлга олганди.
Аввалроқ КХДР асосчиси Ким Ир Сеннинг укаси вафот этгани тўғрисида хабар берилганди.
Изоҳ (0)