КХДР ҳеч қачон Жанубий Корея президенти Юн Сок Ёл томонидан таклиф этилган, ярим оролни ядровий қуролсизлантириш эвазига иқтисодий ва технологик ёрдамни кўзда тутувчи «қўрс ташаббус»га рози бўлмайди. Бу ҳақда Шимолий Корея етакчиси Ким Чен Иннинг синглиси Ким Ё Чжон маълум қилди, деб ёзади «РБК».
17 август куни Юн Сок Ёл КХДРни АҚШ билан алоқаларни нормаллаштиришга дипломатик кўмак, қуролсизланиш масалалари муҳокамаси, молиявий ва халқаро инвестициявий кўмак, шунингдек, озиқ-овқат, қишлоқ хўжалик технологиялари ва тиббий хизмат билан боғлиқ ёрдам эвазига ярим оролни зудлик билан денуклеаризация (ядровий қуролсизлантириш) қилишга чақирган эди.
«Президент Юн Сок Ёлнинг ўз табрик нутқида эълон қилган денуклеаризация йўл харитаси ҳақидаги ғояси аҳмоқликнинг чўққиси ҳисобланади ва биз ҳеч қачон бу билан шуғулланмаймиз», — деди Ким Ё Чжон.
У Жанубий Корея президентининг ушбу баёнотидан кейин ундан «овозини ўчиришни» талаб қилди.
«Агар айтишга бошқа гапи бўлмаса, беҳуда гап гапирмасдан, овозини ўчириб ўтирса, ўзининг обрўси учун яхшироқ бўларди. Наҳотки у иқтисодий ҳамкорликни Шимолнинг обрўси ва ядро қуролига алмаштириш мумкин, деб ҳисобласа?» — дейилади Ким Ё Чжоннинг KCNA давлат ахборот агентлиги эълон қилган баёнотида.
2018 йилда АҚШ ва КХДР хавфсизлик кафолати ва санкцияларнинг олиб ташланиши эвазига Шимолий Кореяни денуклеаризация қилиш бўйича музокараларни бошлаган эди. Аммо кейинроқ Пхеньян Вашингтонни музокараларни чўзишда айблади ва битимни «ҳийла-найранг» деб атади. 2020 йил бошида Ким Чен Ин агар АҚШ КХДРга нисбатан душманлик сиёсатидан воз кечмаса, «ярим орол ҳеч қачон денуклеаризация бўлмаслиги»ни айтганди.
БМТ бош котиби Антониу Гутерриш ядро арсеналига эга мамлакатларни бир неча марта қуролсизланиш йўлига қайтишга чақирган ва ядро қуроли қўлланилмаслигининг ягона кафолати — унинг тўлиқ йўқ қилиниши эканини айтганди. Ўзининг Жанубий Кореяга сўнгги ташрифи чоғида ҳам у КХДРни ядровий қуролсизланишга даъват этганди.
Бунга жавобан Шимолйи Корея ТИВ вакили Ким Сон Гён бу баёнотлар «холис ва адолатли» бўлмагани сабабли бош котиб мажбуриятларига зид эканини ва улар «халқаро ҳамжамиятнинг одилона позицияси»ни билдира олмаслигини айтганди.
Изоҳ (0)