Американинг Филадельфия шаҳридаги ҳайвонот боғида яшовчи, йўқолиб кетиш хавфи остида турган Галапагос тошбақалари жуфтлиги салкам 100 ёшда илк бор фарзандли бўлди.
Ҳайвонот боғи хабарига кўра, урғочи тошбақа томонидан қўйилган тухумлардан биринчи тошбақа 27 февраль куни чиққан, ундан сўнг эса тез орада қолганлари ҳам дунёга келди. Уларнинг ҳар бири 70–80 грамм атрофида, яъни товуқ тухуми оғирлигида.
Ҳайвонот боғи ходимлари ҳали ёрилмаган тухумлар устидан кузатув олиб боришяпти — яқин ҳафталарда яна тошбақалар ёриб чиқиши мумкин.
Олимларнинг айтишича, она тошбақа ҳозирда 97 ёшда. “У 1932 йилда ҳайвонот боғига келтирилган, демак, охирги 92 йил давомида бу боғга келган деярли ҳар бир ташрифчи уни кўрган бўлиши мумкин”, дейди Филаделфия ҳайвонот боғи директори Жо-Elle Могерман.
Унинг жуфти Абраззо 2020 йилда Филаделфияга кўчирилган (аввал Жанубий Каролинадаги ҳайвонот боғида яшаган). Олимларнинг фикрича, унинг ёши 96 да.
| Видео манбаси: | 6аbc Philadelphia YouTube канали |
Ҳозирча чақалоқ тошбақалар ташриф буюрувчилардан йироқда сақланмоқд ва улар “соғлом овқатланиб, яхши ривожланмоқда”, дейилади боғ баёнотида. Режага кўра, улар 23 апрель куни оммага илк бор намойиш этилади.
Филаделфия ҳайвонот боғининг таъкидлашича, бу — 150 йиллик тарихда илк марта Галапагос тошбақаси чақалоқлари дунёга келган ҳолат бўлиб, она тошбақа ўз турининг энг ёши катта биринчи бор она бўлган вакилига айланди.
“Бу — Филадельфия ҳайвонот боғи тарихидаги муҳим босқич. Ушбу янгиликни шаҳримиз, минтақамиз ва бутун дунё билан бўлишишдан жуда бахтиёрмиз,” дея баёнот берди Могерман.
Галапагос тошбақалари ёввойи табиатда йўқолиб кетиш хавфи остида турган ҳайвонлар рўйхатига киритилган. Ҳозирда АҚШдаги ҳайвонот боғларида 50 дан кам бундай тошбақа бор. Бу турдаги тошбақалар охирги марта 2019 йилда АҚШдаги Жанубий Каролинадаги Ривербанкс ҳайвонот боғида туғилган эди.
Сан Диэго ҳайвонот боғи сайтида ёзилишича, Галапагос тошбақалари бутун умри давомида кўпайиш қобилиятини сақлаб қолади. Уларнинг аниқ умр кўриш муддати номаълум, бироқ бу турдаги тошбақалардан бири ҳатто 171 йил яшаган.
Изоҳ (0)