Britaniyada bachadoni transplantatsiya qilingan ayol birinchi marta farzand dunyoga keltirdi. Bu haqda “Pravila jizni” xabar bermoqda.
36 yoshli Greys Devidson bachadonsiz tug‘ilgan va unga o‘smirlik davrida Mayer-Rokitanskiy-Kyuster-Hauzer sindromi tashxisi qo‘yilgan. Bu irsiy kasallik bo‘lib, unga ko‘ra bachadon bo‘lmaydi yoki to‘liq rivojlanmaydi. Shunga qaramay, tuxumdonlar faoliyatini davom ettirib, tuxum hujayralarini va ayol gormonlarini ishlab chiqaradi, bu esa homilador bo‘lish imkonini beradi.
Greys va uning turmush o‘rtog‘i Angus azaldan farzandli bo‘lishni istagan. Britaniyalik shifokorlar esa ularga donordan bachadonni transplantatsiya qilishni taklif etgan.
2023-yilda Greysga bachadon o‘tkazish amaliyoti muvaffaqiyatli amalga oshirildi. Ayolga uning opasi Emi Perdi donorlik qildi. Emining ikki nafar farzandi bor va kelajakda boshqa bola dunyoga keltirishni rejalashtirmagan.
Amaliyotni bajarishdan avval opa-singillar to‘liq tibbiy tekshiruvdan o‘tdi. Greys va uning turmush o‘rtog‘i bepushtlikka qarshi muolaja olib, embrionlarni muzlatib qo‘yishdi. Uning aytishicha, shifokorlar unga surrogat ona bo‘lishni yoki farzandlikka olishni taklif qilishgan, ammo ayol uchun farzandining o‘z tanasida rivojlanishi muhim bo‘lgan.
Bachadonni ko‘chirib o‘tkazish amaliyoti 17 soat davom etdi va muvaffaqiyatli yakunlandi. So‘ng Greys EKU yordamida homilador bo‘ldi va fevral oyining oxirida kesarcha kesish orqali sog‘lom bola dunyoga keltirdi. Yangi tug‘ilgan chaqaloqqa opasi sharafiga Emi deb ism qo‘ydi.
Greys ikkinchi farzandini dunyoga keltirgach, bachadonini olib tashlash lozim, chunki u immunodepressantlar qabul qilishi kerak, aks holda ayol organizmi yangi o‘tkazilgan organni qabul qilmasligi mumkin. Shifokorlarning ta’kidlashicha, bunday preparatlar ba’zi turdagi saraton kasalliklari xavfini oshiradi, shu sababli immunodepressantlarni uzoq muddat qabul qilish mumkin emas.
Emi Izabelning tug‘ilishi ginekolog Richard Smitning 25 yillik tadqiqotlari natijasidir, u bachadonni ko‘chirib o‘tkazish bo‘yicha xayriya tashkiloti Womb Transplant UK rahbari. Shifokor Buyuk Britaniyada vafot etgan donor a’zolaridan foydalangan holda uch marta transplantatsiya amalga oshirgan, hozirda esa o‘nga yaqin ayol operatsiya uchun tasdiqlash jarayonidan o‘tkazilmoqda.
Izoh (0)