“Уммон” гуруҳи асосчиси ва яккахони Зоҳид Рисқиев 20 март куни 35 ёшни қарши олди. Ўз вақтида хит қўшиқлари билан минглаб мухлисларни стадионларга йиға олган гуруҳ афсуски, бугунги кунда фаолият юритмайди. Гуруҳ хонандаларидан бири Жасур Рафиқов хасталик туфайли вафот этди, Зоҳид эса автоҳалокат туфайли маълум муддат ижодий танаффус қилди. Шоҳрух эса айни пайтда ўз бизнесига эга.
Зоҳид Рисқиев бутунлай санъатдан йироқ хонадонда туғилган бўлишига қарамай, болаликдан мусиқа ёзишга, қўшиқ айтишга қизиққан. Кўпчилик уни 2007 йилда ижодни бошлаган деб билади. Аммо у 13-14 ёшидан бошлаб қўшиқларининг хомаки вариантини яратиб, магнитофонда қўшиқлар ёзиб юрган. Оилада ёлғиз ўғил фарзанд бўлган Зоҳиднинг кун келиб, санъаткор бўлишини ҳеч ким кутмаганди.
Зоҳид Рисқиев ҳам осонликча санъаткор бўлгани йўқ. Шахсий ҳаётидаги қийинчиликлар қайсидир маънода ижодкор бўлишига сабаб бўлган бўлса не ажаб. Маълумотларга кўра, онаси унга ҳомиладорлик пайтида келишмовчилик сабаб отаси уларни ташлаб кетган. Кейинчалик она ўғли билан оила қурган ва қизлик бўлган.
“Уммон” гуруҳи вакилларининг бари болаликдан қадрдон бўлишган. Ҳатто, улар боғчага ҳам бирга бориб, мактабда ҳам яқин дўстлар бўлишган. Зоҳид Рисқиев гуруҳнинг тузилишига нима сабаб бўлгани ҳақида сўзлаб берганди:
— Ўша йиллари мактаб тадбирларида қўшиқ куйлаш урфда эди. Жасур ва Шоҳрух ҳам қўшиқлар айтиб, тадбирларда фаол бўлиб юришарди. Уйимда компьютер ва овоз ёзадиган аппаратлар бор эди. Жасурга қўшиқ ёздим, ундан кейин Шоҳрух илтимос қилди. Кейин ҳаммамиз бирга қўшиқ айтсак-чи, деганман. Аммо ҳеч қачон гуруҳ тизиш фикри бўлмаган, деганди интервьюда.
Дўстлар мактабни тамомлаб, пойтахтдаги турли касб-ҳунар коллежларига киришади. Улар орасида фақатгина Жасур Рафиқов Тошкент маданият коллежига ўқишга киради. Ижодга меҳри баланд Зоҳид эса онасининг талаби билан политехника коллежига ҳужжат топширади. Аммо ўқишни якунлаб, диплом олиш насиб этмаган. Кўп қолдирилган дарслар сабаб Зоҳид Ризқиев талабалар сафидан чиқарилган.
Бўлажак хонанда дарсларда фаол бўлмаса-да, техникани яхши тушунарди. Унга компьютер тузатиш, дастур ёзиш қийинчилик туғдирмасди. Шу боис ҳам кўпчилик уни компьютер устаси деб биларди. Бундан ташқари, Зоҳид Рисқиев шеър ёзиш ва мусиқа басталашни тинимсиз машқ қиларди.
“Уммон” йигитларининг ҳеч бирида санъаткор бўламан деган қатъий қарор бўлмаган. Жасур Рафиқовнинг онаси “Дарё”га берган интервьюсида гуруҳ ташкил этилган кунлар ҳақида гапириб берганди.
— Қўшиқларнинг барини Зоҳиднинг уйида яратишарди. Булар шунчаки ҳаваскор бўлиб қўшиқ айтиб юришарди. Бир куни олдимга келди-да: “Она дуо қилинг, биз тўйга кетяпмиз”, деди. “Сизларни тўйда ким ҳам эшитарди”, деб роса кулдим. У пайтлари Жасур кўпроқ қўшиқнинг реп жойларини ижро этарди. Бу йўналиш бизга янгилик бўлгани учунми уларнинг қўшиқ айтишини ҳеч жиддий қабул қилмасдим. Орадан ҳеч қанча вақт ўтмай “Бекободда концерт берамиз”, деб қолишди. Яна ҳайрон бўлдим. Кейин билсам қўшиқлари телефон орқали тарқалиб, ёшлар орасида танилишган экан, дейди онаси Ноила Рафиқова.
Йигитлар аввалига гуруҳни “Жазо” деб номлашган. Аммо бу ном кўпчиликка манзур бўлмаган, яқин танишлари ҳам эътироз билдиришган “Уммон” номини танлашган. “Сокин тун” қўшиғи яратилганидан кейин роппа-роса бир йил ўтиб, йигитларга кутилмаган машҳурлик олиб келган. Аммо қизиғи, улар қўшиқни оммалаштириш учун ҳеч қандай харажат қилишмаган. Қўшиқ аввалига шунчаки “қароқчи” дискларда, ундан кейин телефонларда тарқалган. Гуруҳ одамлар орасидаги оммалашгач, мухлислар талабига кўра қўшиқлари радиода янграган.
— Зоҳид қўшиқ ёзарди, Жасур гапга уста бўлгани учун ташкилий ишларга, интервьюларга жавоб берарди. Мен эса клип суратга олиниши керак бўлса молиявий томонларни ҳал қиларди. Пул тикмасдим, шунчаки даромад келгунига қадар маблағ топардим. Тўй ёки концертлардан маблағ топганимиздан кейин харажатларни қоплардик, дейди Шоҳрух Исамуҳаммедов.
“Уммон” гуруҳи кутилмаган омадга эришган дейиш мумкин. Чунки ижодини 2007 йилда бошлаган йигитлар 2010 йилдан яккахон концерт дастурини беришни бошлашди. Икки-уч йил “Туркистон” санъат саройида берилган концерт, 2015 йилдан бошлаб “Халқлар дўстлиги” санъат саройида тақдим этилди. Албатта, бунга талабнинг юқорилиги сабаб бўлган.
Йигитларнинг бошқа гуруҳлардан фарқли жиҳати шундаки улар ўзига хос ҳаракатларни бажариб, қўшиқ куйлашарди. Бунинг учун эса рақс машғулотларига бориб, профессионал раққосдан сабоқ олишарди.
Зоҳид Рисқиевнинг ташқи кўриниши ва қўшиқ куйлаш услуби қизиқчилар томонидан кўп марта танқид остига олинган. Аммо Шоҳрух Исамуҳаммедовнинг айтишича, Зоҳид бунга умуман эътибор бермасди.
— “Миллион” концертига таклиф этганида бир йил борган, кейин умуман бормаган. Унга бундай нарсалар ёқмайди. Баъзан ҳазилларни ошириб юборишса, жаҳлим чиқиб кетарди. Аммо Зоҳид бунга эътибор бермай, тинчгина ижодини қилаверарди. Тинимсиз қўшиқ ёзиб, уни бизга эшиттирарди, дейди Шоҳрух Исамуҳаммедов.
Зоҳид Рисқиев фақатгина “Уммон” учун эмас, балки бошқа хонандалар учун ҳам қўшиқ ёзган. Хусусан, Лола унинг яратган бир нечта қўшиқларни куйлаган.
“Уммон” нафақат санъат саройларида балки стадионларда концерт бериш борасида ҳам пешқадам эди. Улар Ўзбекистон вилоятларидан тортиб қўшни республика стадионларини ҳам ўз мухлислари билан тўлдиролган. Уларнинг концерти раққоса ва қизиқчиларсиз ҳам аншлаг бўларди. Аммо кутилмаганда Зоҳид Рисқиев гуруҳдан ажралиб чиқишга қарор қилди. Бу Жасур ва Шоҳрух учун кутилмаган зарба бўлди.
— Уларнинг орасини бузишди. Албатта, совуқчилик тушишига биринчи галда пул сабаб бўлди. Кейин у айтмаган гапни бунисига айтди, дейишганидан кейин уч дўстнинг муносабатларига путур етди, дейди Жасур Рафиқовнинг онаси Ноила Рафиқова “Дарё”га берган интервьюсида.
Шоҳрух Исамуҳаммедов интервьюлардан бирида гуруҳ бўлиниши қандай юз бергани ҳақида тўхталган:
— Муносабатларимиз ҳеч қачон ёмонлашмаган. Фақатгина Зоҳид “Ҳаммамиз якка ёки мен алоҳида, сизлар гуруҳ бўлиб ижод қилиб кўрайлик. Бу ҳам санъатда бир юриш бўлади”, деган дейди у.
2018 йилнинг ёзидаги гуруҳ парчаланди. Зоҳид Ризқиев якка ижод қилишга қарор қилди. Шоҳрух ва Жасур эса “Уммон” гуруҳини сақлаб қолмоқчи бўлди. Аммо икки йил ўтар-ўтмас Жасур Рафиқов санъатни тарк этгани ва тадбиркорлик билан шуғулланишини маълум қилди.
Қизларнинг ёқимтойи бўлган Зоҳид Рисқиев турмуш ўртоғи Камола Ортиқова билан тўйда танишиб қолган. Улар 2020 йилда оила қуришди. Афсуски, 2022 йилнинг 29 сентябрь куни Зоҳид Рисқиев шахсий автомобилида даҳшатли фалокатга учради. Икки ойдан ортиқ вақт мобайнида комада ётган ижодкор ҳалигача эркин юра олмайди, қўлларини бемалол ҳаракатлантира олмайди. Хонанданинг рафиқаси Камола Instagram саҳифасига унинг физиотерапия муолажаларини олаётгани акс этган видеоларни тез-тез жойлаб туради.
Зоҳид ва Камола бугунги кунда бир ўғил ва бир қиз фарзанднинг ота-онаси.
Изоҳ (0)