АҚШда биотехнолог олимлар 13 минг йил аввал йўқолиб кетган бўри турини қадимги ДНК асосида қайта тиклади. Улар тур белгиларига эга иккита эркак ва битта урғочи бўри олди. Бу ҳақда The New York Times хабар берди.
2021 йилда Colossal Biosciences биотехнология компанияси олимлари машҳур “Тахтлар ўйини” сериали орқали танилган ва бутунлай йўқ бўлиб кетган “даҳшатли бўрилар” (dire wolves) қолдиқларидан ДНК ажратиб олишга муваффақ бўлган.
Олимлар ушбу тарихий турнинг асосий хусусиятларини қайтариш учун кулранг бўриларнинг 20 та генини таҳрирлаган. Сўнг, таҳрирланган ҳужайралар асосида эмбрионлар яратилган ва улар суррогат она итларга жойлаштирилган.
Натижада учта соғлом бўри дунёга келган: 6 ойлик иккита эркак (Ромул ва Рем) ҳамда 2 ойлик урғочи (Кҳалиси). Улар йўқолиб кетган бўрилар турининг баъзи хусусиятларини ўзида сақлаб қолган.
Colossal компаниясининг бош илмий ходими Бет Шапиронинг айтишича, бу — йўқ бўлиб кетган ҳайвон турини қайта тиклаш йўлида эришилган биринчи муваффақиятли тажриба ҳисобланади.
Биз бир пайтлар тирик бўлган мавжудотларнинг функсионал нусхаларини яратмоқдамиз, деди у.
Олимларнинг таъкидлашича, бу бўрилар табиий муҳитга чиқарилмайди ва тутқунликда сақланади. Шу билан бирга, Colossal компанияси технологияси айни пайтда йўқолиб кетиш хавфи остида турган қизил бўриларни сақлаб қолишда муҳим рол ўйнаши мумкин.
Изоҳ (0)