АҚШ президенти Дональд Трамп маъмурияти Мартин Лютер Кингнинг ўлдирилиши бўйича Федерал қидирув бюроси ҳужжатларини ошкор қилди. Бу ҳақда Миллий разведка директори Тулси Габбард маълум қилди.
Қотилликдан қарийб 60 йил ўтиб, у билан боғлиқ 230 мингдан ортиқ ҳужжат эълон қилинди. Улар шахсий ҳаёт дахлсизлигини сақлаш мақсадида минимал даражада таҳрирланган. Ҳужжатлар орасида ФҚБ тергов тафсилотлари ва ички ёзишмалар ҳам мавжуд.
Мартин Лютер Кинг 1968 йил апрель ойида Теннесси штатининг Мемфис шаҳрида, 39 ёшида ўлдирилган. Унинг ўлими бутун АҚШ бўйлаб норозиликлар ва оммавий тартибсизликлар тўлқинини келтириб чиқарган. Суиқасд учун айбланган Жеймс Эрл Рей ҳибсга олиниб, 99 йиллик қамоқ жазосига ҳукм этилган. Аммо у 1998 йилда қамоқда вафот этган. Кингнинг фарзандлари эса унинг ҳақиқий қотил бўлганига шубҳа билан қарайди.
Кингнинг ҳаёт бўлган икки фарзанди — 67 ёшли Мартин III ва 62 ёшли Бернис Кинг — оталарининг ўлдирилиши “ўнлаб йиллар давомида жамоатчилик эътиборини тортиб келаётган воқеа” эканини айтган. Бироқ улар бу масаланинг “шахсий ва мураккаб тарихий жиҳатларига” эътибор қаратилиши кераклигини таъкидлаган. Улар ҳужжатларни тўлиқ тарихий контекстда кўриб чиқиш зарурлигини билдирган.
Кингнинг ўлими кўплаб фитна назарияларини келтириб чиқарган. Баъзи тахминларга кўра, суиқасд нафақат бир шахс, балки уюшган гуруҳлар томонидан уюштирилган бўлиши мумкин.
Трамп 2025 йил январь ойида АҚШнинг 35-президенти Жон Кеннеди, унинг укаси — собиқ бош прокурор Роберт Кеннеди ва инсон ҳуқуқлари ҳимоячиси Мартин Лютер Кинг суиқасдлари билан боғлиқ барча материалларни тўлиқ ошкор қилиш бўйича фармойиш берган эди. У бу ваъдани биринчи президентлик даврида ҳам, иккинчи сайловолди кампаниясида ҳам айтганди. Сиёсатчи қотилликлар билан боғлиқ маълумотларни ошкор қилиш “жамоатчилик манфаатига жавоб бериши”ни қайд этган.
АҚШдаги шов-шувли сиёсий қотилликлар
♦ Жон Кеннеди АҚШ президенти этиб сайланганидан икки йил ўтгач, 1963 йил 22 ноябрда Далласга расмий ташрифи чоғида отиб ўлдирилди.
Қотилликда гумонланиб собиқ денгиз пиёдаси Ли Ҳарви Освалд қамоққа олинди. У уч кундан сўнг тунги клуб эгаси Жек Руби томонидан отиб ўлдирилган. Руби кейинчалик қамоқхонада вафот этган
♦ Жоннинг укаси Роберт Кеннеди АҚШ бош прокурори (1961-1964) ва Нью Йорк штати сенатори (1965-1968) лавозимларида ишлаган. У демократлардан президентликка номзодини қўйган ва 1968 йил 5 июнда Лос Анжелесда сайловолди кампанияси давомидаги митингда отиб ўлдирилган.
Жиноят содир этилган жойда фаластинлик Серхан Серхан қўлга олинган. 1969 йилда у ўлим жазосига ҳукм қилинган, кейинчалик ҳукм умрбод қамоқ жазосига ўзгартирилган.
♦ 1968 йил 4 апрелда Теннесси штатининг Мемфис шаҳрида қора танлилар ҳуқуқлари ҳаракатининг етакчиси, руҳоний Мартин Лютер Кинг ўлдирилди. Унинг: “Мен орзу қиламанки, тўрт фарзандим бир кун келиб тери рангига эмас, балки шахсий фазилатларига қараб баҳоланадиган мамлакатда яшайди”, деган машҳур ибораси оммалашганди.
Изоҳ (0)