Андижон вилоятида ниқоб тақиб олган шахслар автомобилга тош отиб, ҳужум қилгани акс этган видео тарқалганди. Вилоят прокуратураси босқинчилик юзасидан жиноят иши қўзғатилганини маълум қилди.
Аниқланишича, 2024 йил 20 ноябрь куни фуқаро Ю.Д. ва бошқалар олдиндан жиноий тил бириктириб, бир гуруҳ бўлиб, фуқаро Л.А.ни бошқарувида бўлган Cobalt автомашинасида пул маблағларини ташиш билан шуғулланишини билиб, унга ҳужум қилиб, пулларни қўлга киритишни режа қилган.
Улар Lacetti ва Cobalt автомашиналари давлат рақам белгиларини ечиб олиб, орқасидан кузатиб келган. Сўнг юзларига ниқоб таққан ҳолда Андижон шаҳрининг “Ёйилма” маҳалласи Амир Темур шоҳкўчасидан ўтган Андижон—Асака йўналишидаги транспорт қатнов йўлининг Андижон йўналиши бўйича йўл четида тўхтаб турган Л.А. автомашинасига тош отиб, ҳужум қилган.
Л.А. автомашинасида ҳодиса жойидан қочгани сабабли жиноятни ўзларига боғлиқ бўлмаган ҳолда охирига етказа олмаган.
Мазкур ҳолат бўйича Жиноят кодексининг 164-моддаси 2-қисми “б” банди (босқинчилик, бир гуруҳ шахслар томонидан олдиндан тил бириктириб) билан жиноят иши қўзғатилиб, Ю.Д. процессуал тартибда ушланган.
Айни пайтда жиноят иши бўйича ички ишлар органи томонидан дастлабки тергов ҳаракатлари олиб борилмоқда. Вилоят прокуратураси томонидан ушбу жиноят иши устидан прокурор назорати ўрнатилган.
Изоҳ (0)