Қорақалпоғистоннинг Тўрткўл туманида юк машинаси ёнилғи бакини пайвандлаш оқибатида портлаш юз берди. Ҳолат акс этган видеолар ижтимоий тармоқларда тарқалди.
Қорақалпоғистон Республикаси Фавқулодда вазиятлар бошқармаси матбуот хизматининг маълум қилишича, ҳодиса 21 март куни соат 13:50 атрофида “Гулистон” МФЙ ҳудудидаги устахонада MAN юк автомобилининг ёнилғи бакини пайвандлаш ишларини олиб бориши оқибатида юз берган.
Бунинг оқибатида MAN ва Форд русумли автомобиллар тўлиқ, DAF русумли автомобилнинг орқа шиналари ёнғиндан зарарланган. 1998 йил ва 1980 йил туғилган Тўрткўл туманида яшовчи икки фуқаро тан жароҳати олиб, туман тиббиёт бирлашмасига ётқизилган. Вафот этган фуқаролар йўқ.
Қайд этилишича, моддий зарар суриштирувлар давомида аниқланади.
Юк машиналари иштирокида юз берган ҳодисалар
11 март куни Тошкент вилояти Ангрен шаҳрида юк ташувчи машина ёниб кетганди. 14 март куни Нукус шаҳрида пропан газ ташувчи MAN юк машинаси ағдарилиб кетди. 19 март куни Андижон вилоятининг Асака туманида электр симларидан чиққан қисқа туташуви натижасида “Зил-130” юк машинасида ёнғин чиққанди.
Изоҳ (0)