Асли сурхондарёлик бўлган, “Афандининг қизлари” лойиҳаси билан машҳурликка эришган актриса Муборак Абдуллаева 26 март куни 27 ёшни қарши олди. “Дугоналар шоу” кўрсатувида ўз фаолиятини бошлаб, сўнг блогерлик билан шуғулланган, ҳозирда тасвирга олиш ишларидан анчайин узоқлашган Муборак ҳаётида катта ўзгаришларни амалга оширмоқда.
“Эркин Комиловнинг қўлида таҳсил олганман”
Муборак болалигида ўзбек санъатида алоҳида ҳурматга сазовор инсон Эркин Комиловдан соҳанинг сир-асрорларини ўрганган.
— Мактабдаги ҳеч бир тадбир менсиз ўтмаган. Доим рол ижро этардим. 5-синфда ўқиётган кезларим онам “Ўзбекфильм”га олиб борганлар. Аввал ўзим борганман, кейин мени олиб боришларини хоҳлаб, боргим келяпти, рол ижро этгим келяпти, деб мажбурлаганман. Майли, ўқиб кўрсин-чи, кейин қизиқиши қолиб кетар, деб рози бўлишган. У ерда Ўзбекистон халқ артисти Эркин Комиловнинг қўлида саҳна нутқи, актёрлик маҳоратидан дарс олганман. Гапирсалар жим бўлиб тинглардим, у ерда қандайдир куч мени ўраб оларди, дейди актриса.
“Блогерлик сабаб университетдан ҳайдалганман”
Муборак талабалик йилларида реклама ва вайн съёмкалари сабабли олийгоҳни тарк этган.
— Мени Instagram’да кўрадиганлар ёшимни катта деб ўйлайди. Ҳеч қачон ёшимни беркитмаганман. Тошкент маданият коллежининг Драма театри актёрлиги йўналишида ўқиганман. Олийгоҳда ҳам актёрлик факультетига ҳужжат топшириб, кира олмаганман. Ижодий имтиҳондан юқори балл олган бўлсам ҳам, тестим паст чиққан. Келаси йили бу йўналишга эмас, Санъат назарияси ва тарихи йўналишига кирдим. Сабаби дугоналарим шу соҳада ўқирди. Рақс, балет, театр, кино, тасвирий санъат — умуман санъатнинг исталган тури ҳақида ўқитилади. Лекин бир оз афсусланганман, чунки фақат назарий билимлар оламиз. Мен эса саҳнада махсус кийимларда рол ижро этаётганимда маза қилардим. Ўша пайтда блогерлик ривожланиб кетди ва учинчи курсда мен ўқишдан ҳайдалдим. Съёмкалар, рекламалар кўп бўларди, энг авжига чиққан пайтида ўқишга вақт ажратолмай қолганман, дейди Муборак Абдуллаева.
“ ‘Афандининг қизлари’ билан орамизда тушунмовчиликлар бўлди”
Нигора Абдуллахонова, Нигина Жабборова ва Муборак Абдуллаева учун “Афандининг қизлари” қисқа муддат ичида кутилмаган машҳурлик олиб келди. Аммо гуруҳ ижоди гуллаб-яшнаётган вақтда қизлар айрилди.
— “Афандининг қизлари” бўлиб чиққанимизда бизни бачкана деганлар ҳам, ёқди, давом этинг, деганлар ҳам бўлди. Оладиган видеоларимиз ҳаётий, одамларнинг ичидаги мавзулар. Масалан, қайнона-келин, пули йўқ севишганлар. Лекин ҳаммасининг ўз вақт-соати бўларкан. Орамизда бир оз келишмовчиликлар ўтгандир, лекин пул билан боғлиқ эмас. Биласиз, қизларнинг характери ҳам турлича бўлади. Аввалига Нигина чиқиб кетди, театрдаги фаолиятимни давом эттираман деди. Мен Нигора опа билан видеолар олишда давом этдим, лекин барибир бир қўлимиз йўқдек эди. Айтганимдек, барчасининг белгиланган вақти бор. Нигора опа билан ҳам, Нигина билан ҳам муносабатларим яхши, гаплашиб турамиз, дейди у.
“Келин кўйлак сиғмаганида озишим кераклигини тушунганман”
Муборак Абдуллаева ошқозон кичрайтириш операциясини бошдан кечириб, ҳозирги кўринишига келган ва бундан жуда мамнун. Операция ўтказишга унга нима туртки бўлди?
— Мен олдин 140 килограмм эдим. Ошқозон операциясини қилдириб, вазн ташлаганимдан сўнг ўзимда аёллик жозибаси кучайганини ҳис қилдим. Аввал эркакшода бўлганман, ўғил бўла дўстларим кўп эди. Озишим сизларга халақит бермасин, ўзим хоҳласам озиб оламан, дердим. Ўзимни доим боримча қабул қилиб, боримча севганман. Менга ҳеч ким ҳеч қачон семизсан, хунуксан, озишинг керак, демаган. Аксинча, сен озма, шундоқ ширинсан, сенга озиш ярашмайди дейишарди. Ўзим ҳам мени боримча севадиган инсон келади, деб ўйлардим. Лекин ҳозир семиз аёлни ҳеч ким яхши кўрмайди, буни қабул қила олиш керак. Эркаклар доим чиройли аёлларга қараган — бу уларнинг фитратида бор.
140 килограмм эканлигимда операция қилдирдим, икки йил давомида 60 килограммга оздим. Яъни танамдан битта Муборак чиқиб кетди. Шу сабабли менга аввал Муборак ундай эди, ҳозирги бундай бўлиб қолган, деган гапларни айтмасликларини хоҳлайман. Ҳозир бошқа Муборакман.
Мен ҳеч қачон келин кўйлак кийиб рол ўйнамайман, дердим ёки атайин жуда юқори гонорар қўярдим. Бир клип съёмкасида келин кўйлак кийишим учун айтган нархимни беришди. Аммо менга келин кўйлак сиғмади. Ойнага қараб тургандим, ичимдаги Муборак йиғлади. Эртага турмушга чиқсам, шунақа хунук келин бўламанми, деган фикр менда жуда қаттиқ стрессга сабаб бўлди. Жуда кўп сабабсиз йиғлайвердим. Тўғри, юзим чиройли бўлиши, ҳамма мени яхши қабул қилиши мумкин. Лекин ташқи кўринишимдан ўзим қониқмадим. 140 килограммга қараб кетаётганимни ҳаттоки билмаганман ҳам. Чиройлиман, деб ўзимни балки алдаб юргандирман.
Туркияда операция қилдиришни режалаштириб юрган вақтим мен бормоқчи бўлган шифокор Тошкентга келиб қолди. Докторга ҳам “Мени ҳеч нима қийнамаяпти, озсам хунук қиз бўлиб кетмайманми, ўртача озсам етади” деганман. Шу билан бир ҳафтада дугонам билан Истанбулга бордим. Операцияга кириб кетаётганимда Instagram’да йиғлаб сториэс қўйганман. Сабаби раҳматли блогер Фарҳод Маннопов нотўғри наркоз сабаб оламдан ўтганди. Мен ҳам жуда қўрққанман. Операцияга йиғлаб кириб, юлдуз бўлиб чиққанман. Ўзбекистонда телевизорда мен ҳақимда кўрсатишган. Дадам ҳатто операцияга кирганимни “Муборак Абдуллаева Истанбулда ошқозон операциясини ўтказди” деган хабар чиққанда билган. Шундан кейин менга Instagram’да жуда кўп аёл-қизлар қўшилиб, уларда ҳам шу муаммо борлигини ёзган. Мен операциядан кейинги жараёнларни, нима еб-ичсам, борини қўйдим. Ҳозирги кунгача 60 килограмм оздим, яна 20 килограмм озишни мақсад қилганман, дея ўз ҳикояси билан бўлишди у.
“Бўлажак турмуш ўртоғим билан дўст бўлишни хоҳлайман”
Актриса қийинчилик билан эришилган бахт узоқ яшайди, деган фикрда. У отаси каби инсонга турмушга чиқмоқчи.
— Дугоналарим билан ҳозир саёҳат эмас, тақдир ҳақида ўйлаймиз (кулиб). Кейин яна майли, бир гап бўлар, деб кулиб кетаверамиз. Шу йигитга турмушга чиқасан дейишса, индамай кўниб кетадиган 18 ёшли қиз эмасмиз. Турмуш қурадиган инсон билан дунёқарашимиз бир-бирига тўғри келиши керак. Шу сабаб танлов жараёни қийинлашиб қолади. Instagram’да баъзи қизларни кўриб, ростдан жаҳлим чиқади. Маҳрга “Гелик” сўрайди, йигит кунига 10 минг доллар сарфласин, ўз бизнеси бўлсин, дейди. Балки улар ҳам сал ўтиб тўғри фикрлайдиган бўлар. Мен болаликда ота-онами кўриб турмуш ўртоғим яхши инсон бўлсин, уй-жой, машина, бойликка аста-секин эришиш мумкин, деб ният қилганман. Қийинчиликни енгиб ўтган инсонлар бир-бирини кўпроқ қадрлайди.
Турмуш ўртоғим билан дўст бўлайлик, яхши-ёмон тарафларимизни билайлик, тўйдан кейин ўзимиздан кимнидир “ясаб” олмайлик, унгача ҳаммасидан бохабар бўлайлик, деб ёшлигимдан ният қилардим. Шунда ишонч, ҳурмат бўлади, севги бўлади, деб ўйлаганман ва ҳозиргача шу фикрдаман. Ота-онам ҳам синфдош бўлишган, лекин улар бир-бирига “Дунёда охирги инсон сен бўлиб қолсанг ҳам, сен билан турмуш қурмайман” дейишган. Ёшликдаги болаларча уришиш-да. Отам каби инсон бўлса, турмушга чиқардим, дея ният қилади Муборак.
“Рўмол ўрагач, қалбим таскин топди”
Муборак ҳижобга киргач, съёмкалардан узоқлашгани ва ижодни соғинмаётгани ҳақида ҳам сўзлади.
— Бир йилдан буён камерадан узоқлашганман, уятчан бўлиб қолганман. Instagram’да ҳам аввалгичалик фаол эмасман. Ижодни соғинмадим, тасвирга олиш жараёнлари, камералардан қочиб юраман. Кино, клип премераларига борсам ҳам, интервью оламиз дейишади, мен эса интервью беришни ҳам хоҳламайман. Рол ўйнаш ҳам қўлимдан келмай қолди. 2024 йилнинг 6 мартида ҳижобга кирганман. Ўша вақтдан бошлаб санъат соҳасида ишламайман, деб қарор қилганман. Шундан буён бунга хоҳиш-истагим йўқ. Бу қароримдан кейин қалбим таскин топди. Ёш улғайгани сари инсоннинг фикрлаши ўзгариб бораркан, дейди у.
“Съёмкаларга бормасам ҳам, даромадим бор”
Авваллари асосий даромади рекламалар ва телеканаллардан бўлган Муборакнинг бугунги кунда ўз бизнеслари бор.
— Instagram охирги 3-4 йилда жуда ривожланди. Олдин клип, сериалларда чиққанман, лекин “Афандининг қизлари” лойиҳаси жуда катта машҳурлик ҳам, даромад ҳам берган. Instagram орқали телевидениеда ишлаганман. Уй, машина, саёҳатларга ҳам у орқали эришганман. Ҳозир ҳам даромадим Instagram’дан. Ҳар куни реклама олмасам ҳам, лекин етарли. Дўстларим билан умрага юборадиган тур фирма ҳам очганмиз. Бу шериклик асосидаги кичик бизнес. Instagram оламига кириб келишимдан олдин ҳам катта ўлчамда кийинадиган аёллар учун кийим-кечак дўкони очгандим. Ҳозир араб тилидан дарс оляпман, тилнинг грамматикасини мукаммал ўрганишга киришдим. Вақтим зоэ кетмаяпти, дейди Муборак Абдуллаева.
Изоҳ (0)