Соғлиқни сақлаш вазирлиги, Хитой Савдо-саноат палатаси ва Henan Costar Group компанияси ўртасида Ўзбекистон тез тиббий ёрдам хизмати учун замонавий электромобилларни етказиб бериш бўйича шартнома имзоланди. Бу ҳақда ССВ матбуот хизмати хабар қилди.
“Учрашувимиз давомида 150 млн АҚШ долларлик келишувларга эришилди. Яъни, тез тиббий ёрдам хизмати учун замонавий автотранспорт воситаларини керакли равишда етказиб берамиз. Шунингдек, яқин келажакда бу турдаги электромобилларни мамалакатингизни ўзида ишлаб чиқаришни йўлга қўямиз”, — деган Henan Costar Group компанияси бош директори Яо Хуатин “Ўзбекистон24” телеканалига берган интервьюсида.
Республика тез тиббий ёрдам маркази бош директори Абдувоит Ғафуровнинг маълум қилишича, Iveco электромобиллари тест синови тариқасида Ўзбекистоннинг турли ҳудудларида фойдаланиб кўрилади ва натижаси бўйича тез ёрдамга электромобиллар жорий қилинади.
Iveco энг замонавий электромобил бўлиб, битта қувватда 450 километргача юради. Ёқилғи-мойлаш масаласида 10 баравар тежамкор. Машина намликка ва иссиққа чидамли бўлиб, хизмат қилиш даври жуда катта.
Абдувоит Ғафуров, шунингдек, Хитой компанияси буюртма асосида бир нафар парамедик фелдшер юрадиган ихчам автомобиль яратиб берганини ҳам маълум қилди. Ушбу автомобиль кунига 15 тадан 25 тагача чақирувларни бажара олади.
Республика тез тиббий ёрдам маркази бош директорининг билдиришича, Ўзбекистонда чақирувларнинг 15 фоизи госпитализация, яъни беморни бевосита шифохонага етказиш билан боғлиқ, 85 фоизи эса енгил чақириқлардир. Машиналар шундай енгил чақириқларга борадиган бригадаларга берилади.
Хабарда айтилишича, ушбу электромобиллар тегишли синовлардан муваффақиятли ўтганидан сўнг инвестиция асосида харид қилинади.
“Аҳоли саломатлиги — 2030” миллий стратегияси лойиҳасида тез тиббий ёрдам автомобилларининг 50 фоизи электромобиллар билан тўлдирилиш вазифаси қўйилганди.
Изоҳ (0)