Moskvaning “SSKA” klubi yarim himoyachisi Abbosbek Fayzullayevga Turkiyaning grand jamoasi – “Galatasaroy” qiziqish bildirmoqda. Bu haqida Markaj News nashri xabar bermoqda.
Manbaga ko‘ra, “Galatasaray” Fayzullayev transferi bo‘yicha jiddiy qiziqish bildirmoqda. Turk klubi hozirda o‘zbekistonlik futbolchining atrofidagi vaziyatni kuzatib turibdi.
21 yoshli futbolchi ushbu mavsumda “SSKA”ning muhim futbolchilaridan biri bo‘lish barobarida, O‘zbekiston terma jamoasi safida ham asosiy o‘yinchilardan biri sanaladi.
Avvalroq futbolchiga Germaniyaning “Bavariya” klubi qiziqish bildirgani haqida xabarlar tarqalgan edi.
Joriy mavsum Abbosbek Rossiya Premyer Ligasida 19 o‘yin o‘tkazib, 2 gol va 3 assist muallifiga aylangan. Uning “SSKA” bilan amaldagi shartnomasi 2026-yilning iyun oyiga qadar mo‘ljallangan. Fayzullayev O‘zbekistonning Jahon chempionati saralashidagi uchrashuvlarida 4 gol urib, jamoaning eng yaxshi to‘purari bo‘lib turibdi.
