DXX va Bosh prokuratura huzuridagi departament xodimlari tomonidan o‘tkazilgan tezkor tadbirda Andijonda pul evaziga Yaponiyaga yuborishni va’da qilgan shaxslar ushlandi.
Xususan, Andijon shahrida yashovchi, 1990-yilda tug‘ilgan shaxs fuqarolarni Yaponiyaga ishga yuborish bo‘yicha ijtimoiy tarmoqlar orqali e’lon tarqatib, ko‘pchilikning ishonchiga kirgan. Ammo u Toshkent shahrida istiqomat qiluvchi fuqaroni amaldagi tartib-qoidalarni chetlab o‘tgan holda, Yaponiya davlatiga ishlash uchun yuborish evaziga 7400 AQSH dollari olgan vaqtida DXX va Bosh prokuratura huzuridagi departament xodimlari tomonidan ashyoviy dalillar bilan ushlangan.
Unga nisbatan Jinoyat kodeksining 168-moddasi (firibgarlik) 2-qismi “a” bandi bilan jinoyat ishi qo‘zg‘atildi.
Boshqa holatda esa Andijon viloyatining Oltinko‘l tumanida yashovchi, 1995-yilda tug‘ilgan shaxs va uning Toshkent shahrida istiqomat qiluvchi, 1995-yilda tug‘ilgan tanishi o‘zaro til biriktirib, poytaxtlik fuqaroning ishonchiga kirgan. Ular mansabdor tanishlari orqali fuqaroni Yaponiyaga ishga yuborish evaziga 2500 AQSH dollari talab qilgan.
Huquqni muhofaza qiluvchi organlar tomonidan o‘tkazilgan tezkor tadbirda ulardan biri —Toshkent shahrida yashovchi, 1995-yilda tug‘ilgan shaxs so‘ralgan pul mablag‘ini olgan vaqtida ashyoviy dalillar bilan ushlangan.
Qonunbuzarlarga nisbatan Jinoyat kodeksining 168-moddasi (firibgarlik) 2-qismi “a” bandi bilan jinoyat ishi qo‘zg‘atildi.
Migratsiya agentligi bosh mutaxassisi Jasur Sa’dullayev fuqarolardan Migratsiya agentligi hamda tegishli lisenziyaga ega 18 ta xususiy bandlik agentliklaridan tashqari, har qanday shaxslar yoki tadbirkorlik subyektlari tomonidan chet elga ishga yuborish bo‘yicha bildiriladigan asossiz takliflarga aldanib qolmasliklarini so‘radi.
“Xorijiy davlatlarga qonuniy tartibda ishlash uchun bormoqchi bo‘lgan vatandoshlarimiz “xorijdaish.uz” elektron platformasidan zarur ma’lumotlarni olishlari mumkin. Bundan tashqari, Migratsiya agentligining 1282 yoki 71-200-00-61 raqamlariga qo‘ng‘iroq qilishlari, shuningdek, uning hududiy filiallariga tashrif buyurib mutaxassislardan bepul maslahatlar olishlari mumkin”, deydi mutaxassis.
Chet elda yordamga muhtoj bo‘lib qolgan fuqarolar esa 17 ta davlat hududidan xalqaro chiqish kodlari orqali 1282 qisqa raqamiga to‘g‘ridan to‘g‘ri bepul qo‘ng‘iroq qilib, amaliy yordam olishlari mumkin.
3-fevral kuni Toshkentning Uchtepa tumanida fuqarodan firibgarlik bilan 20 ming dollar olgan shaxslar ushlangandi. Ular fuqaroni AQSHga ishga yuborishini aytib, aldagan. 13-yanvarda Samarqand viloyatining Urgut tumanida yashovchi fuqaro o‘g‘li bilan til biriktirib, ikki kishini AQSHga ishga yuborishini aytib, evaziga 21 ming dollar talab qilgandi.
Izoh (0)