Давлат хавфсизлик хизмати ходимлари томонидан Тошкент шаҳри, Андижон ва Фарғона вилоятларида ҳаж зиёратига ноқонуний юборишни ваъда қилган шахслар қўлга олинди.
Қайд этилишича, Чилонзор туманида ўтказилган тезкор тадбирда, 58 ва 56 ёшли ака-ука ўзаро тил бириктириб, юқори лавозимда ишловчи танишлари орқали икки нафар фуқаронинг Саудия Арабистонига ҳаж сафарига боришлари учун талаб этиладиган виза ҳужжатларини тайёрлаб бериш ва уларни зиёратга юбориш эвазига 12 минг доллар олган вақтларида ашёвий далиллар билан ушланган.
Терговга қадар текширув давомида, ушбу ноқонуний ишга Тошкент шаҳридаги сайёҳлик фирмасининг муқаддам фирибгарлик жиноятлари учун икки маротаба судланган ижрочи директори алоқадор эканлиги маълум бўлган.
Андижон вилоятининг Избоскан туманидаги сайёҳлик фирмаси ходими мазкур туманда истиқомат қилувчи фуқарони алдов йўли билан ишончига кириб, уни ва онасини жорий ҳаж мавсумида муборак сафарга юбориш эвазига 15 минг доллар талаб қилган. У сўралган пул маблағидан 7 минг долларини олган вақтида ДХХ ва Бош прокуратура ҳузуридаги департамент ходимлари томонидан ушланган. Шунингдек, у мазкур ноқонуний ишни сайёҳлик фирмаси раҳбари билан келишган ҳолда амалга оширгани аниқланган.
Фарғона вилоятининг Бағдод туманида яшовчи 34 ёшли шахс ижтимоий тармоқлар орқали фуқароларни 8,7 минг доллар эвазига ҳаж зиёратига жўнатишини айтиб, Бувайда туманида истиқомат қилувчи 43 ёшли фуқаро ва унинг 65 ёшли онасини ҳожи мақомини олишлари учун Саудия Арабистонига юбориш эвазига 17,4 минг доллар талаб қилган. У сўралган пул маблағидан 10 минг долларни олган вақтида Давлат хавфсизлик хизмати ва ички ишлар органлари ходимлари томонидан ушланган.
Марғилон шаҳрида фаолият юритувчи сайёҳлик фирмаси раҳбари эса Қўштепа туманида яшовчи фуқарони ҳаж амалларини бажариши учун Саудия подшоҳлигига юбориш эвазига 14 минг доллар талаб қилиб, олдиндан 10 минг доллар олган вақтида ушланган.
Ҳозирда мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.
Ўзбекистонда ҳаж мавсуми 2024 йил 23 майдан бошланди. Республикадан Саудия Арабистонига 7 июнга қадар ҳар куни авиақатновлар амалга оширилади. Ўзбекистон фуқаролари учун умумий ҳаж квотаси 15 минг нафар этиб белгиланди.
Изоҳ (0)