Лионель Мессининг “Интер Майами”га ўтгани Америка футболига кутилганидан кўпроқ эффект бермоқда. Аргентиналикнинг Майамига ўтиши MLS’ни ўзгартиришга улгурди, гарчи Месси янги клуби сафида бирорта ўйин ўтказмаган бўлса ҳам.
Чинга айланган ҳазил
Лео 2018 йилда “Интер Майами”нинг ишга туширилиши муносабати билан Девид Бекҳэмни табриклаган ва видеомурожаатида ҳазил қилганди: “Балки келажакда менга қўнғироқ қиларсан”.
Клуб эгалари юлдуз футболчиларни жалб қилиш ғоясидан бирор мартта воз кечмади. Месси ва Роналдуни бир жамоада ўйнатиш ҳақида биринчилардан бўлиб жиддий гапирган ҳам Бекҳэм эди.
MLS комиссари Дон Гарбер 2023 йилнинг мартида лига Мессини жалб қилиш учун кераклик ҳаракатларни амалга оширишга тайёр эканини айтди.
Мавсум якунига бориб Мессининг келажаги ҳақидаги саволлар мавҳумлигича қолаверди. У сўнгги лаҳзагача “Барселона”га қайтишни хоҳлади. Саудия Арабистонидан эса бир неча юз миллионлик таклифлар бўлди.
“Интер Майами” қарорни кутди, чунки уларнинг таклифи олдиндан тайёрлаб қўйилганди. Натижада MLS ютиб чиқди. Девид Бекҳэмга тегишли клуб тирик афсона билан келишувга эришди.
Пеле тажрибаси
Америка лигаси учун бу ҳақиқатда жуда улкан қадам. Мессининг келишини мусобақа янги тарихидаги энг муҳим воқеа сифатида эътироф этиш мумкин. Эффект шубҳасиз улкан бўлади ва 1975 йилда “Нью-Йорк Космос”га ўтган Пеле бунга ёрқин мисол.
Бразилиялик афсона ташрифидан кейин “Космос” уй ўйинларида томошабин ташрифи 3,5 мингдан 45 мингга қадар ўсганди. Уч марта жамоа 70 мингдан зиёд томошабин тўплаган, бунақасини ўша вақтлар тасаввур қилиш қийин эди. Пеленинг ташрифи лигага Жорж Бест, Йохан Кройф, Франс Беккенбауэр ва Герд Мюллер каби юлдузларни жалб қилди.
Ҳа, кейинчалик бу шов-шувли трансферларни амалга оширган Шимолий Америка футбол лигаси (NASL) йўқ бўлиб кетди. Бироқ маълум вақтдан кейин унинг ўрнида MLS бўй кўрсатди. Бу даврни ўзгартириш чеки Бекҳэмга тушганди. Унинг ортидан Златан Ибраҳимович ва бошқа кўплаб юлдузлар ташриф буюрди.
Маркетинг
Месси — барча маркетологлар орзусидаги футболчи. АҚШда эса қиммат активдан максимум фойда олишни жуда яхши билишади. “ПСЖ”даги ҳолатни эслаймиз: Лео биринчи йили клубга 700 миллион евролик узоқ йиллик ҳомийлик шартномалари келтирди. Унинг ортидан қатор номдор брендлар Париж клуби билан битим имзолади. Сотилган либосларнинг 60 фоизи Месси номи остида эди ва умуман Лео трансферидан сўнг “ПСЖ” футболкалари сотуви 40% ўсишга эришди.
Мессиси бор “Интер Майами” катта эҳтимол билан Америка лигасидаги энг қиммат брендга айланади. Натижалар қандай бўлиши муҳим эмас. Муҳими клуб аллақачон тижорий томондан ўзига жалб қилувчи лойиҳага айланди.
Месси трансферидан сўнг
- Ижтимоий тармоқлар
Трансфер эълон қилинган кунгача клуб Instagram саҳифасида 900 минг обуначи бор эди. Айни вақтда эса — 8 миллион. Ҳеч қайси MLS клуби бу қадар кўп обуначига эга эмас.
Футболчи кетганидан кейин “ПСЖ” бир неча кун ичида 2 миллиондан зиёд обуначисини йўқотди, катта эҳтимол билан улар Мессининг янги клуби саҳифасига обуна бўлган.
- Чипталар
Месси трансфери эълон қилингандан кейин бир неча соат ичида “Интер Майами” уй ўйини учун чиптанинг ўртача нархи 31 доллардан 152 долларга кўтарилган. Масалан, 25 август куни бўлиб ўтадиган “Нью-Йорк”ка қарши ўйин чиптаси 983 долларга кўтарилган, трансфердан олдинги нархдан (99 доллар) 883 фоизга кўп. 3 сентябрга мўлжалланган “Лос-Анжелес” билан ўйин чиптаси эса 400 фоизга кўтарилган — 150 дан 785 долларга.
Месси янги жамоасида қачон дебют қилиши номаълум. ОАВга кўра, аргентиналик 21 июль куни Лига Кубоги доирасидаги Мексиканинг “Крус Асул” клубига қарши баҳсда дастлабки ўйинини ўтказади. Бу ўйин чиптасининг ўртача нархи 1248 долларга тенг, бу трансфердан аввалги нархдан (ўртача 120 доллар) 10 баробарга кўп дегани.
- Трансляциялар
MLS трансляцияларини Apple TV сервиси амалга оширади. Мессининг келишида ушбу сервиснинг ҳам ҳиссаси бор. Мессининг “Интер Майами” билан шартномасига кўра, футболчи сервиснинг янги фойдаланувчилари ҳисобига улуш олади. Бир оз олдин Apple мавсум охиригача бўлган лига ўйинлари обунасини 99 доллардан 49 долларга туширди ва бу аудиториянинг ўсишини яна-да тезлаштиради. Компания обуначилар сонини ошкор қилмайди, бироқ Apple мутасаддиларининг сўзларига кўра, обуначилар ва кўришлар сони кутилганидан анча яхши.
Изоҳ (0)