Роберт Левандовски Мессидан сўнг Испания чемпионатининг бир мавсумида дастлабки 22 ўйинида 19 та ёки ундан кўпроқ гол урган биринчи футболчи бўлди. Бунгача фақат аргентиналик футболчи 2019—20 йилги мавсумда шундай натижага эришган эди. Бу ҳақда OptaJose ижтимоий тармоқдаги Х саҳифасида хабар берди.
Испания чемпионатининг 23-турида Каталония клуби “Севилья”га қарши ўйинда ғалаба қозонди — 1:4. 9 февраль куни бўлиб ўтган учрашувда полшалик футболчи жамоасининг дастлабки голига муаллифлик қилди.
Левандовски 2022 йилдан бери “Барселона” сафида тўп суради. Унинг клуб билан шартномаси 2026 йилгача мўлжалланган. Transfermarkt портали футболчининг трансфер нархини 15 миллион евро деб баҳоламоқда.
Жорий мавсумда Левандовски барча мусобақалар доирасида 33 ўйинда майдонга тушиб, 31 та гол урди ва 3 та голли узатма амалга оширди.
Аввалроқ полшалик футболчи 90 ўйинда 60 та гол уришга эришгани ҳақида маълумот берилган эди.
Изоҳ (0)