АҚШ Ўзбекистонга ўпкани сунъий нафас олдирувчи 200 та аппарат юборди

АҚШдан Ўзбекистонга умумий қиймати 2,5 миллион доллар бўлган ўпкани сунъий нафас олдирувчи 200 та аппарат юборилди, деб хабар бермоқда «Дунё» АА.

Ўзбекистоннинг АҚШдаги элчихонаси маълумотига кўра, аппаратлар президент Дональд Трамп администрацияси томонидан июнь ойида эълон қилинган инсонпарварлик ёрдамининг бир қисми сифатида хайрия қилинмоқда.

Ўзбекистонда коронавирус пандемиясига қарши кураш чораларини қўллаб-қувватлаш учун тиббий жиҳозларни юбориш масаласи Вашингтондаги элчихонада Оқ уй администрацияси, АҚШ Давлат департаменти ва Халқаро тараққиёт агентлиги (USAID) вакиллари билан ўтказилган қатор маслаҳатлашувларда муҳокама қилинган.

Аппаратлар Ўзбекистон соғлиқни сақлаш муассасаларининг техник инфратузилмасини ҳисобга олган ҳолда махсус буюртма асосида Американинг Zoll Medical Corporation компанияси томонидан ишлаб чиқарилган. Улар стационар даволанишда, ҳаво тиббий транспортида ёки тез ёрдам машиналарида ташиш пайтида интенсив терапия учун ишлатилади.

Америка томонидан тақдим этилган ушбу аппаратлар Соғлиқни сақлаш вазирлиги томонидан вилоятлардаги 62 та тиббиёт муассасаси ўртасида тақсимланади.

Аввалроқ Дубай амирлиги Ўзбекистонга коронавирусга қарши 723 миллион сўмлик дорилар ва тиббий воситалар жўнатгани, Германия Ўзбекистонга кислород баллонлари, тиббий ниқоблар ва комбинезонлардан иборат инсонпарварлик ёрдами юборгани, Ўзбекистон Қирғизистонга 560 минг долларлик инсонпарварлик ёрдами жўнатгани,  Сингапурдан 30 та кислород концентратори беғараз ёрдам сифатида олиб келингани, хабар берилган эди.