Қашқадарёда 28 ёшли аёлнинг жасади ҳаммомдан топилгани, уни собиқ эри ўлдириб кетгани тўғрисида хабар берилганди. “Марказий студия” информацион дастурида маълум қилинишича, қотил эркакка нисбатан суд ҳукми ўқилган.
Қайд этилишича, аёл Касби туманининг “Тинчлик” маҳалласидан “Қамаши” маҳалласига турмушга чиққан. Оилавий келишмовчиликлар сабаб 3 нафар фарзанди билан ўзининг маҳалласига қайтиб, ижарада яшаб келган.
2022 йилнинг 7 декабрь куни Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилиб, гумонланувчи процессуал тартибда ушланган.
Олти ой давом этган тергов жараёнларидан кейин иш судга оширилган. Суд жараёнида эркак ўша куни маст бўлганини айтиб, ўзини оқламоқчи бўлган.
Суд ҳукмига кўра, аёлини ўлдирган судланувчига нисбатан 11 йил-у 6 ой муддатга озодликдан маҳрум қилиш жазоси тайинланган.
Эр-хотин ўртасидаги қотиллик ҳолатлари
Бир неча кун олдин Сирдарё вилояти Ширин шаҳрида хотинини фарзанди ёнида пичоқлаб ўлдирган эркакка суд ҳукми ўқилганди. Ундан олдин эса Санкт-Петербургда ўзбекистонлик эркак 19 ёшли хотинини бўғиб ўлдиргани, Жиззахда ўғли ва аёлини ўлдириб, ёқиб юборган 23 ёшли йигит умрбодга қамалгани, Жиззахда жанжал оқибатида хотинини ваннада пичоқлаб ўлдирган эркакка ҳукм ўқилгани тўғрисида хабар берилганди.
Изоҳ (0)