Бухоро вилоятининг Когон шаҳрида эр рашк сабаб хотинини пичоқлаб ўлдирди. Бу ҳақда Бош прокуратура ахборот хизмати раҳбари Ҳаёт Шамсутдинов “Дарё”га маълум қилди.
28 май куни соат 17:30 ларда Ш.Х. (1992 йилда туғилган) турмуш ўртоғи, икки нафар фарзанднинг онаси бўлган Г.Х. (1991 йилда туғилган) билан рашк туфайли ўзаро тортишиб, жанжал қилган. Жанжал пайтида эр ошхона пичоғи билан турмуш ўртоғининг танасининг турли соҳаларига (кўкрак, бўйин, қўл) бир неча маротаба уриб, қасддан ўлдирган.
Шунингдек, ажратиш мақсадида ҳаракат қилган гумонланувчининг онаси О.Х. ҳам ўнг билак соҳасидан жароҳат олиб касалхонага мурожаат қилган.
Ҳолат юзасидан 28 май куни шаҳар прокуратураси томонидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилиб, эркак Жиноят процессуал кодексининг 221-моддаси тартибида ушланган.
Эри томонидан пичоқланган аёллар
Март ойида Бухорода эр жанжал сабаб хотинини пичоқлагани, Жиззахда эр рашк сабаб аввал хотинини кейин эса ўзини пичоқлаб ўлдиргани ҳақида хабар берилган эди. Апрелда Фарғона вилоятида эркак рафиқаси ва қайнотасини пичоқлаб ўлдирди. Май ойи бошларида Наманган давлат университетида эркак ўз хотинини пичоқлаб, унинг қотилига айланди.
Изоҳ (0)