Жиноят ишлари бўйича Шайхонтоҳур туман судида қасддан одам ўлдириш жиноятини содир қилган судланувчига нисбатан иш кўриб чиқилди. Бу ҳақда Тошкент шаҳар судлари маълум қилди.
Қайд этилишича, 44 ёшли ушбу шахс муқаддам олти маротаба судланган. У қамоқдан чиққанидан кейин акаси билан уй устида жанжаллашиб қолган. Ака унга уйни сотиш таклифини берган, ука эса уйга тўлиқ ўзи эга чиқишни истаган.
19 февраль куни келишмовчилик оқибатида хавфли рецидивист акасини калтаклаган. “Менга пичоқ кўтарди, мен ҳам урдим. Уйдан чиқиб кетдим, ҳали тирик эди. Уч кундан кейин мени қўлга олишиб, ўлганини айтишди”, — дейди айбланувчи.
Суд-тиббий экспертизаси хулосасига кўра, марҳум бош мия ёпиқ жароҳати, бош мия тўқималари ва пардалари остида қон қуйилиши, шунингдек, кўкрак қафаси ва икки томонлама қовурғалар синиши, ўпка ва буйрак лат ейиши, талоқнинг ёрилиши ва бошқа тан жароҳатларидан вафот этган.
Жиноят ишлари бўйича Шайхонтоҳур туман судининг ҳукми билан Жиноят кодексининг 97-моддаси (қасддан одам ўлдириш) 2-қисми “ж, с” бандларида назарда тутилган жиноятни содир қилган шахсга 85 миллион 505 минг сўм жарима ва 17 йил 6 ой муддатга озодликдан маҳрум қилиш жазоси тайинланган.
Пичоқлаш билан якунланган оилавий жанжаллар
Сурхондарё вилоятида эркак қайнукаси томонидан, Самарқандда 70 ёшли эркак 60 ёшли қайнукаси томонидан пичоқланганди. Бухорода эр жанжал сабаб хотинини пичоқлагани, Жиззахда эр рашк сабаб аввал хотинини кейин эса ўзини пичоқлаб ўлдиргани, Вобкент туманида маст фуқаро қайнукасини пичоқлагани тўғрисида хабар берилганди. Бир неча кун олдин Тошкентнинг Миробод туманида 21 ёшли йигит ўз акасини пичоқлаб ўлдиргани тўғрисида хабар берилганди.
Изоҳ (0)