Хоразм вилоятида аёл оилавий келишмовчиликлар сабаб эрига 26 маротаба пичоқ уриб, уни ўлдирди. Бу ҳақда “Ҳудуд” информацион дастурида маълум қилинган.

Маълумотларга кўра, бу шаръий никоҳда яшаб келган эр-хотиннинг иккисини ҳам иккинчи турмуши бўлган. Эрининг қарзи, хотини номига олинган кредитлар натижасида оиланинг тез-тез тинчлиги бузилиб, жанжаллар кўпайган. Шу каби жанжалларнинг бирида эркак хотинига кредитларни қандай иш қилиб бўлса ҳам тўлаши кераклигини айтган.

Бу воқеалардан кейин аёл эрини ўлдириш режасини тузиб, жиноят содир бўлган куни аёл олдиндан ётоқхонага яшириб қўйилган ошхона пичоғи билан ухлаб ётган эрига урган. Эркак ўрнидан туриб, қаршилик кўрсатганида аёл унга яна 26 маротаба пичоқ санчган.

“Ўзимни уйим бор, 1,4 миллион сўмдан тўлайман деди. У ҳам ўзининг уйи эмас экан, ижара бўлиб чиқди. Хотини билан ажрашмаган, ‘ЗАГС’ ҳам бекор бўлмаган экан… Соғломлаштириш марказига бор, эркакларни массаж қилиб, пул топ деди. У ердаги вазиятни кўриб қайтиб келдим… Хотини билан телефонда гаплашиб юраверди, ҳамма нарса руҳиятимга кучли таъсир қилди. Алданганим, хўрланганим, бир фирибгарнинг тузоғига тушиб, мана шу жиноятга қўл урдим”, — дейди айбланувчи аёл.

Жиноят ишлари бўйича Янгиариқ туман суди ҳукми билан айбланувчи М.Б. Жиноят кодексининг 97-модда (қасддан одам ўлдириш) 2-қисми “в, ж” бандларида назарда тутилган жиноятни содир этганликда айбли деб топилди ва у 10 йил муддатга озодликдан маҳрум этилди.

Эри томонидан пичоқланган аёллар

Март ойида Бухорода эр жанжал сабаб хотинини пичоқлагани, Жиззахда эр рашк сабаб аввал хотинини кейин эса ўзини пичоқлаб ўлдиргани ҳақида хабар берилган эди. Апрелда Фарғона вилоятида эркак рафиқаси ва қайнотасини пичоқлаб ўлдирди. Май ойи бошларида Наманган давлат университетида эркак ўз хотинини пичоқлаб, унинг қотилига айланди. Куни кеча Бухоро вилоятининг Когон шаҳрида эр рашк сабаб хотинини пичоқлаб ўлдиргани маълум бўлганди.