Қашқадарё вилояти Ғузор туманида ўзи билан учрашиб юрган аёлни ўлдирган жондорлик 36 ёшли эркакка суд ҳукми ўқилди. Бу ҳақда “Бир жиноят изидан” кўрсатувида маълум қилинди.
Қайд этилишича, 2023 йилнинг 28 февраль куни Ғузор тумани ИИБга туманнинг “Миришкор” қишлоғида яшовчи, 35 ёшли С.М. синглисининг уйида ўлдириб кетилгани ҳақида хабар келиб тушган. Тезкор тергов гуруҳи зудлик билан воқеа жойига етиб борган.
Марҳуманинг жасади ҳовлидаги чуқурлиги 2,5 метрлик қудуқдан чиқариб олинган. Ҳолат юзасидан Жиноят кодексининг 97-моддаси (қасддан одам ўлдириш) 1-қисми билан жиноят иши қўзғатилиб, тергов ҳаракатлари бошланган.
Тергов жараёнида марҳума кейинги пайтларда Бухоро вилоятининг Жондор тумани, “Демун” маҳалласида яшовчи 36 ёшли С.Э. билан учрашиб юргани аниқланган. 2021 йилда турмуш ўртоғидан ажрашган С.М. оила қуриш мақсадида “ЗўрTV” телеканалида эфирга узатиладиган “Ёр-ёр” кўрсатувида чиқиш қилган. 2021 йилнинг декабрь ойида унга Жондор туманида яшовчи С.Э.дан қўнғироқ бўлган ва улар ўзаро танишиб олишган.
Ғузорга тез-тез қатнашни бошлаган эркак, С.М. билан унинг синглисининг уйида учрашиб юрган. Аммо тўйдан дарак бўлмаган. Охир-оқибат аёл ва эркак ўртасида жанжал келиб чиққан: аёлга тан жароҳати етказиб, ҳушсиз ҳолга келтирган. Сўнгра эса уни ўлди деган ўйда ҳовлидаги қудуққа ташлаб юбориб, ўлимига сабабчи бўлган.
Жиноят ишлари бўйича Ғузор туман судининг ҳукми билан С.Э.га 13 йил озодликдан маҳрум қилиш жазоси тайинланган.
Эр-хотин ўртасидаги қотиллик ҳолатлари
Аввалроқ Сирдарё вилояти Ширин шаҳрида хотинини фарзанди ёнида пичоқлаб ўлдирган эркакка суд ҳукми ўқилганди. Ундан олдин эса Санкт-Петербургда ўзбекистонлик эркак 19 ёшли хотинини бўғиб ўлдиргани, Жиззахда ўғли ва аёлини ўлдириб, ёқиб юборган 23 ёшли йигит умрбодга қамалгани, Жиззахда жанжал оқибатида хотинини ваннада пичоқлаб ўлдирган эркакка ҳукм ўқилгани тўғрисида хабар берилганди.
Изоҳ (0)