Тошкент шаҳар Мирзо Улуғбек туманида эркак ўз аёлини пичоқлаб ўлдирди. Бу ҳақда “Миллар” дастурида хабар берилди.
Маълум бўлишича, воқеа жорий йилнинг май ойида тумандаги кўп қаватли уйларнинг бирида содир бўлган. Эркак дастлаб аёлининг кўкрак қафасининг орқа қисмига, сўнг олд томонига пичоқ тиқиб, тан жароҳати етказган.
Жиноят ишлари бўйича Мирзо Улуғбек туман судида мазкур ҳолат юзасидан суд иши кўриб чиқилди. Судланувчи нима сабабдан бу жиноятни содир этганига қуйидагича изоҳ берди:
“2011 йил аёлим билан яхши ниятда турмуш қурганмиз, икки нафар фарзандимиз бор. Қишда келиб, баҳорда Россияга кетардим ишлашга. Май ойида телефонда бошқа эркак билан гаплашаётганини эшитиб қолдим, ким, деб сўрасам, дугонам, деди. Ёлғон гапиришлар бошланди. Билсам спиртли ичимликлар ичадиган бўлибди, чекадиган бўлибди. 17 май куни ҳар хил сўзлар билан ҳақоратлаб, нафсониятимга тегди. Русчалаб сўкинди, ҳаромидан олиб ҳаромига солди, итнинг боласи, деди. Телефонни олиб, синдириб ташласам деразага югурди, бақираман, деди. Билмай қолдим, пичоқладим. Болаларим чиқиб қолганидан кейин ўзимга келдим. Иккаласи ҳам қўрқиб кўчага қочди. Мингдан минг пушаймонман. Яхши кўрардим уни. Шу вақтгача оилам учун яшаб келганман”, — дейди эркак.
Суд ҳукми билан эркак Жиноят кодексининг 97-моддаси 1-қисми билан 11 йил муддатга озодликдан маҳрум қилинди.
Пичоқлаш билан якунланган оилавий жанжаллар
Март бошларида Бухорода эр жанжал сабаб хотинини пичоқлагани, Жиззахда эр рашк сабаб аввал хотинини, кейин эса ўзини пичоқлаб ўлдиргани, Вобкент туманида маст фуқаро қайнукасини пичоқлагани тўғрисида хабар берилганди.
Шунингдек, 2022 йилнинг декабрида Тошкент вилоятида келин оилавий келишмовчилик оқибатида қайнонасини камида 20 маротаба пичоқлаган эди. Ушбу ҳолат юз берган хонадонда қайнона-келин ўзаро чиқиша олмай қолган. Пичоқланган қайнонанинг айтишича, 9 ойдан бери келини унинг гапларига кирмай, айтган ишларини қилмай келган.
Изоҳ (0)