Ўзбекистоннинг қайси ҳудудларида аҳоли кўпроқ даромад олаётгани маълум қилинди

Ўтган йили мамлакатда аҳоли жон бошига даромадларнинг реал ўсиши 5,9 фоиз бўлди. Бу ҳақда Статистика агентлиги маълумот берди.

2024 йил январь–декабрь ойларида Ўзбекистон аҳолисининг умумий даромадлари 896,3 трлн сўмни ташкил этди (реал ўсиш 8,1 фоиз). Бу аҳоли жон бошига йилига 24,1 млн сўмдан тўғри келади.

Аҳолининг умумий даромадлари — мажбурий тўловлар (солиқлар) ва бошқа ажратмаларни амалга оширгунга қадар бўлган ялпи даромадни ифода этади.

Йил давомида жами даромадларнинг 58,7 фоизи кичик тадбиркорликдан олинган. Бир йи ичида аҳоли жон бошига умумий даромадлар реал ўсиш суръати 5,9 фоиз даражасида бўлган.

Ҳудудлар кесимида бир кишилик даромаднинг энг юқори миқдор Тошкент шаҳрида қайд этилган — 60,6 млн сўм. Шу билан бирга, Навоий (38,1 млн сўм сўм), Бухоро (27, 5 млн сўм) ва Тошкент (25,1 млн сўм) вилоятлари аҳолиси ўртачадан юқори даромад олган.

Йил давомида энг қуйи даромадлар Наманган вилояти (16,8 млн сўм), Қорақалпоғистон Республикаси (16,8 млн сўм) ва Сурхондарё вилоятида (17,9 млн сўм) кузатилган.

Аҳоли жон бошига умумий даромадларнинг энг юқори реал ўсиши Тошкент шаҳри (15,4 фоиз), Навоий (7,9 фоиз) ҳамда Тошкент (6,4 фоиз) вилоятларида қайд этилган. Ўз навбатида бу кўрсаткич нисбатан кўп ҳудудларда ўртачадан паст шаклланган. Хусусан, Самарқанд (5,3 фоиз) Андижон (4,8 фоиз), Хоразм (4,7 фоиз) Сирдарё (3,7 фоиз), Қашқадарё (3,2 фоиз) ва Бухоро (2,4 фоиз) вилоятлари ҳамда Қорақалпоғистон Республикаси (2,4 фоиз), Жиззах (2 фоиз), Фарғона (1,1 фоиз) Наманган (0,5 фоиз), Сурхондарё (0,2 фоиз) вилоятларида натижалар ёмон бўлган.

Агентлик аҳолининг умумий даромадлари таркибини ҳам очиқлаган. Маълум қилинишича, жами даромадларнинг 27,9 фоизи ёлланма ишчиларга тегишли. Шунингдек, 35 фоиз қисми мустақил равишда банд бўлишдан, 7,8 фоизи шахсий истеъмол учун ўзида ишлаб чиқарилган хизматлардан ва 3,3 фоизи мол-мулкдан олинган даромадлардир.

Йил давомида аҳоли мол-мулкдан умумий ҳисобда 30,1 трлн сўм даромад олган. Мазкур турдаги даромадларнинг қарийб учдан икки қисми ёки 63,5 фоизи Тошкент шаҳри ҳиссасига тўғри келган. Навоий вилояти эса 5,8 фоиз улуш билан кейинги юқори кўрсаткичга эга чиққан.

Маълумот учун, 2023 йилда аҳоли умумий даромадлари 728,8 тлрн сўмни (жон бошига 20 млн сўмдан), 2022 йилда 634,8 трлн сўмни (бир одамга 17,8 млн сўмдан), 2021 йилда 515,7 трлн сўмни (киши бошига 14,8 млн сўмдан) ташкил этган. 2020 йилда аҳолининг бир йиллик даромади 401,5 трлн сўм бўлган. Бу жон бошига 11,7 млн сўмдан тўғри келган.

Аввалроқ 2024 йилда Ўзбекистонда ўртача номинал (солиқ ва бошқа тўловларни ўзи ичига олган) ойлик иш ҳақи 5 млн 357 минг сўмни ташкил этгани хабар қилинганди. 

Ўтган йил январь–декабрь ойларида ҳудудлар бўйича ўртача ойлик иш ҳақининг энг юқори кўрсаткичи доимгидек Тошкент шаҳри кузатилган — 9,1 млн сўм. Кейинги ўринларда Навоий (6,7 млн сўм), Тошкент (5,1 млн сўм), Андижон (4,6 млн сўм) ҳамда Бухоро (4, 3 млн сўм) вилоятлари қайд этилган.

Энг кам ўртача иш ҳақи Қашқадарё (3,8 млн сўм), Сурхондарё (3,8 млн сўм) ва Наманган (3,9 млн сўм) вилоятларида кузатилган.