Илмий даража олиш учун ўтказилган диссертация ҳимояларининг 70 фоизи жонли эфирга узатилмагани аниқланди

Коррупцияга қарши курашиш агентлиги томонидан ўтказилган мониторинг таҳлилларига кўра, 2024 йилда ўтказилган 3400 дан ортиқ диссертация ҳимояларининг 70 фоизга яқини жонли эфирга узатилмаган. Бу ҳақда “Дарё”га агентлик матбуот котиби Шерзод Сапаров маълум қилди.

Давлат раҳбарининг 2023 йил 28 ноябрдаги “Коррупцияга қарши курашиш тизимини янада такомиллаштириш ҳамда давлат органлари ва ташкилотлари фаолияти устидан жамоатчилик назорати тизими самарадорлигини ошириш чора-тадбирлари тўғрисида”ги фармонига мувофиқ фалсафа доктори (PhD) ва фан доктори (DSc) илмий даражасини олиш учун илмий кенгаш томонидан ўтказиладиган диссертация ҳимояси жараёнларини интернет тармоғи орқали жонли эфирга узатиш белгиланган.

Мазкур фармон ижросини таъминлаш мақсадида Коррупцияга қарши курашиш агентлиги томонидан республикадаги 152 та муассасанинг расмий веб-сайти асосида таҳлил қилинган. 

“Унга кўра, мазкур даврда илмий кенгашлар томонидан фалсафа доктори (PhD) ва фан доктори (DSc) илмий даражасини олиш учун ўтказилган жами 3400 дан ортиқ диссертация ҳимоясидан 1130 таси, яъни 33 фоизи интернет тармоғи орқали жонли эфирга узатилган.

100 дан ортиқ муассасанинг расмий веб-сайтида ҳимоя жараёнини ҳеч қандай чекловларсиз жонли эфир орқали кузатиш имконини берувчи ҳаволалар тақдим этилмаган.

Бу каби ҳолатларга асосан қуйидаги муассасаларда йўл қўйилган:
— Қорақалпоқ давлат университети; 
— Наманган муҳандислик-технология институти; 
— Урганч давлат университети;
— Тошкент давлат шарқшунослик университети;
— Тошкент давлат стоматология институти;
— Тошкент педиатрия тиббиёт институти;
— Тошкент давлат техника университети “Фан ва тараққиёт” ДУК;
— Андижон давлат тиббиёт институти;
— Ўзбекистон давлат жисмоний тарбия ва спорт университети;
— Чирчиқ давлат педагогика университети;
— Қарши давлат университети ва бошқалар, дейилади агентлик ахборотида.

Таъкидланишича, агентлик томонидан қонунчилик талабларини бузган муассасаларга тегишли кўрсатмалар ва огоҳлантириш хатлари киритилган.

Аввалроқ Ўзбекистонда 2024 йилда жами 6898 нафар шахс томонидан 5716 та коррупцияга оид жиноят содир этилгани маълум қилинганди.