Андижон вилоятида вояга етмаган қизга нисбатан уятсиз-бузуқ ҳаракатлар қилган шахс маъмурий жавобгарликка тортилганлиги ҳақида хабар берилган эди. Бош прокуратура томонидан суд қарорлари қонунийлиги ўрганилди.
Ўрганиш натижасига кўра, Бош прокуратура томонидан Олий суд жиноят ишлари бўйича судлов ҳайъатига жиноят ишлари бўйича Асака туман судининг 2024 йил 10 декабрдаги ва Андижон вилоят суди апелляция инстанциясининг 2024 йил 23 декабрдаги қарорларига нисбатан тафтиш тартибида протест келтирилди.
Немолчи.узънинг ёзишича, ҳолат 2024 йил ноябрида юз берган. 1987 йилда туғилган эркак аёли билан бўлган интим эҳтиёжларини қондира олмаган ва унга қўшниси М.ни (2011 йилда туғилган) олиб келишини айтган. Бироқ, эркакнинг сўзларига кўра, у ухлаб қолгани учун кейин нима бўлганини эслай олмайди. Унинг рафиқаси эса апелляция судида адашиб, эри айтган Р. ўрнига унинг вояга етмаган синглиси — 13 ёшли М. ни олиб келганини айтган.
Вояга етмаган қизнинг сўзларига кўра, қўшни аёл уни эри билан жинсий алоқа қилиши учун уйига олиб келган. Аёл бунинг эвазига 50 минг сўм таклиф қилган ва қиз “ҳеч нарсани кўрмаслиги ва оғриқни ҳис қилмаслиги” учун кўзини боғлаб қўйишини ҳам айтган. Қиз буни рад этгач суҳбатга аёлнинг эри ҳам аралашган ва у рози бўлса 100 минг сўм беришини айтган. Қиз қўрқиб, қочиб кетган.
Бош прокуратура матбуот хизмати берган маълумотга кўра, қизнинг онаси қўшни эр-хотинлар уятсиз-бузуқ ҳаракатлар қилгани ҳақида ички ишлар органига мурожаат қилган. Олиб борилган терговга қадар текширув ҳаракатлари натижасига кўра, фуқаро А.Б. ва унинг турмуш ўртоғи Ю.Т.ни маъмурий жавобгарликка тортиш тўғрисида қарор қабул қилиниб, тўпланган ҳужжатлар мазмунан кўриш учун судга юборилган.
Суднинг тегишли қарори билан эркак 5 сутка маъмурий қамоқ жазоси, унинг аёлига эса БҲМнинг икки баробари (750 минг сўм) миқдорида жарима жазоси тайинланган.
Мазкур суд қароридан норози бўлиб берилган апелляция шикояти қаноатлантирилмаган.
Изоҳ (0)