Андижон вилояти Қорасув шаҳрида Matiz ҳайдовчиси Equinox’га теша билан ҳужум қилди. Вилоят ИИБ ахборот хизмати ҳолат юзасидан маълумот берди. 

Унга кўра, 14 май куни соат 18:20 да фуқаро М.М. ўзининг бошқарувидаги Matiz’да отаси билан Қорасув шаҳар ҳудудида ҳаракатланиб кетаётган вақтида ариза муаллифи О.А. ўзининг бошқарувида бўлган Equinox’да уларнинг ҳаракатланишига тўсқинлик қилиб, М.М.нинг отасига ноўрин хатти-ҳаракат қилган. 

Шу сабабли М.М. отасини уйига ташлаб, О.А.нинг ортидан бориб, отасига нисбатан бўлган ҳурматсизлик юзасидан ўзаро гап тортишган ва видеода акс этган ҳолатларни содир қилган.

Мазкур ҳолат юзасидан ўтказилган текширувлар даврида мурожаатчи О.А.нинг автомашинасига 7 016 542 сўм миқдорда зарар келтирилгани, бироқ ушбу ҳолатда бирор-бир шахсга нисбатан тан жароҳатлар етказилмагани аниқланган.

Ҳолат бўйича ўтказилган терговга қадар текшириш ҳаракатлари якунига кўра, М.М.га нисбатан Маъмурий жавобгарлик тўғрисидаги кодекснинг 41-моддаси (ҳақорат қилиш), 61-2-моддаси 1-қисми (мулкни қасддан нобуд қилиш ёки унга зарар етказиш), 135-моддасида (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) кўрсатилган ҳуқуқбузарликларни содир қилгани боис тўпланган ҳужжатлар маъмурий тартибда чора кўриш учун жиноят ишлари бўйича Хонобод шаҳар судига юборилган.