Andijonda Wi-Fi router o‘rnatib harakatlangan Equinox haydovchisiga chora ko‘rildi. Bu haqda Andijon viloyat yo‘l harakati xavfsizligi boshqarmasi matbuot xizmati xabar bermoqda.
Qayd etilishicha, ijtimoiy tarmoqlarda 2001-yilda tug‘ilgan haydovchi A.T.ga tegishli bo‘lgan Equinox rusumli transport vositasiga ruxsat etilmagan qurilma (Wi-Fi antenna) o‘rnatib olgan holatda harakatlangani aks etgan video keng jamoatchilik e’tiroziga sabab bo‘lgan.
Mazkur holat yuzasidan YHXB xodimlari tomonidan o‘tkazilgan tezkor surishtiruv davomida qoidabuzar haydovchi aniqlanib, unga nisbatan bayonnoma tuzilib, transport vositasi vaqtinchalik saqlash uchun jarima maydoniga joylashtirilgan.
Bundan tashqari, o‘rganish davomida ushbu haydovchi o‘tgan bir yil davomida sodir etgan qoidabuzarlik holatlari tekshirilganida o‘ndan ortiq qo‘pol turdagi qoidabuzarlik sodir etganligi va har bir holat uchun tegishli choralar ko‘rilganligi aniqlandi.
Shuningdek, xabarda haydovchining viloyat YHXB mutasaddilariga aloqasi yo‘qligi ta’kidlab o‘tilgan.
Izoh (0)