Президентнинг 10 февралдаги фармони билан “Ўзэнергоинспекция” ходимларига тадбиркорлик объектларини куннинг исталган пайтида текшириш ваколати берилди.
Фармон билан энергия ресурсларидан ноқонуний фойдаланиш ҳолатларига қарши курашиш соҳаси такомиллаштирилиши муносабати билан президентнинг айрим ҳужжатларига ўзгартириш ва қўшимчалар киритилди. Ушбу ўзгариш ва қўшимчаларда ёқилғи-энергетика ресурсларини беҳуда сарфлаш ҳамда улардан ноқонуний ва самарасиз фойдаланиш ҳолатларини аниқлаш, сифатсиз ёқилғи маҳсулотлари реализациясига чек қўйиш борасида давлат назоратини амалга ошириш механизмларини соддалаштириш кўзда тутилган.
Жумладан, президентнинг 2023 йил 24 майдаги “Ёқилғи-энергия ресурсларидан фойдаланиш соҳасида давлат назорати самарадорлигини ошириш чора-тадбирлари тўғрисида”ги фармонига киритилган қўшимчага кўра, “Ўзэнергоинспекция” томонидан ёқилғи-энергетика ресурсларини қазиб олиш, ишлаб чиқариш, қайта ишлаш, ташиш, сақлаш, етказиб бериш (тақсимлаш, сотиш) ва истеъмол қилиш фаолияти билан шуғулланадиган хўжалик юритувчи субъектларда уларнинг фаолиятини тартибга солувчи қонунчилик ҳужжатларига риоя этилиши бўйича ўтказиладиган назорат тадбирлари доирасида сутканинг исталган вақтида ўтказиладиган текширувлар текширув бошлангандан сўнг 24 соат ичида “Ягона давлат назорати” ахборот тизимида рўйхатга олиш орқали ваколатли органни хабардор этиш тартибида амалга оширилади.
“Тадбиркорлар ҳуқуқлари ва қонуний манфаатларини ишончли ҳимоя қилиш чора-тадбирлари тўғрисида”ги президент фармонига киритилган ўзгартиришга кўра, “Ўзэнергоинспекция” қуйидаги масалалар бўйича тезкор назорат тадбирларини ўтказади:
- ёқилғи-энерия ресурсларини қазиб олиш, ишлаб чиқариш, қайта ишлаш, ташиш, сақлаш, етказиб бериш (тақсимлаш, сотиш) ва истеъмол қилиш фаолияти билан шуғулланадиган хўжалик юритувчи субъектларда ушбу соҳадаги талабларга риоя этиш,
- ёқилғи-энергия ресурсларини беҳуда сарфлаш, улардан ноқонуний ва самарасиз фойдаланиш ҳамда истеъмолчиларга реализация қилинаётган ёқилғи-энергия ресурслари сифатини (нефть ва газ маҳсулотларидан намуналар олиш, лабораторияларда таҳлил қилиш, миқдорини ўлчаш ва тарқатиш) назорат қилиш.
Фармонда қайд этилишича, энергия ресурсларидан ноқонуний фойдаланиш ҳолатларига қарши курашиш соҳасида самарали давлат назоратини амалга оширишга тўқсинлик қилаётган айрим омилларни бартараф этиш мақсад қилинган.
Ўзбекистонда электр энергияси бўйича тадбиркорларга солинадиган жарималар миқдори қайта кўриб чиқилиши режалаштирилган. Бу ҳақда президентнинг бизнес учун тенг шароит ва адолатли рақобат муҳитини таъминлашга қаратилган фармонидаги “Йўл харитаси”да белгиланди.
“Ўзэнергоинспекция” давлат раҳбарининг 2022 йил 21 декабрдаги фармонига мувофиқ Энергетика вазирлиги ҳузурида ташкил этилганди. 2024 йил августдан ушбу инспекция Вазирлар Маҳкамаси бўйсунувига ўтказилди.
Изоҳ (0)