Ўзбекистонда 15 февраль куни 2,6 млрд сўм ёки 30 мингта хонадоннинг бир ойлик истеъмолига тенг ҳажмдаги электр энергиясидан ноқонуний фойдаланиш ҳолатлари аниқланди. Бу ҳақда Энергетика вазирлиги ахборот хизмати хабар берди.
Хабарга кўра, 15 февраль куни Энергетика вазирлиги ҳузуридаги “Ўзэнергоинспекция” ва ҳуқуқни муҳофаза қилувчи органлар билан ҳамкорликда ўтказилган назорат тадбирларида 119 та ҳолатда 6,3 млн кВт соат миқдоридаги (жами 2,6 млрд сўм) электр энергиясидан ноқонуний фойдаланиш ҳолатлари аниқланди.
Қайд этилишича, ушбу ҳажмдаги электр энергияси ўртача 30 мингта хонадоннинг бир ойлик истеъмолини ташкил қилади. Мисол учун:
- Наманган шаҳрида жойлашган “Истиқилол Жавоҳири” МЧЖ электр тармоғига ўзбошимчалик билан уланиши натижасида 646 миллион сўм;
- Қўшработ туманида жойлашган “Замин Сирожхон” фермер хўжалиги электр тармоғига ўзбошимчалик билан уланиши натижасида 275 миллион сўм;
- Бўстонлиқ туманида “Сардор-Сарвар-Акмал Строй” МЧЖ электр тармоғига ноқонуний уланиши орқали 187 миллион сўм қайта ҳисоб-китоб амалга оширилди.
Электр энергиясидан ноқонуний фойдаланган истеъмолчиларнинг электр қурилмалари тармоқдан ажратилиб, ҳолат бўйича расмийлаштирилган ҳужжатлар ҳуқуқни муҳофаза қилувчи органларга юборилаётгани таъкидланди. Ҳудудларда назорат тадбирлари давом эттирилмоқда.
Президент қарори билан ёқилғи-энергия ресурсларидан оқилона ва самарали фойдаланишни таъминлаш ва бу борадаги жараёнларни рақамлаштириш мақсадида 2023 йил 1 мартдан бошлаб “Ўзэнергоинспекция”га “Ҳудудий электр тармоқлари” АЖ, “Ҳудудгазтаъминот” АЖ, “Ўзбекистон миллий электр тармоқлари” АЖ, “Ўзтрансгаз” АЖларнинг электр энергияси ва табиий газни назорат қилиш ҳамда ҳисобга олишнинг автоматлаштирилган тизимларидаги ёқилғи-энергия ресурслари истеъмоли тўғрисидаги маълумотларни мониторинг қилиш имконияти яратилиши айтилган эди. “Ўзэнергоинспекция” “Ҳудудий электр тармоқлари” АЖ, “Ҳудудгазтаъминот” АЖ, “Ўзбекистон миллий электр тармоқлари” АЖ, “Ўзтрансгаз” АЖ билан биргаликда ҳар ойда электр ва газ тармоқлари ҳамда қурилмаларининг юкламалари ва созлигини текшириб бориб, аниқланган камчиликларни бартараф этиш чораларини кўради.
Шунингдек, “Ўзэнергоинспекция” 2023 йил 1 майга қадар ёқилғи-энергия ресурсларидан ноқонуний ва самарасиз фойдаланиш ҳолатларини аниқлаш ҳамда уларни онлайн расмийлаштириш учун барча ходимларни махсус планшетлар билан таъминланиши хабар қилинган. Бундан ташқари, мавжуд электр ва газ тармоқлари ҳамда қурилмаларининг юкламаси белгиланган меъёрдан ошган тақдирда, уларга янги истеъмолчиларни улаш қатъиян тақиқланганди.
Изоҳ (0)