Энергетика вазирлиги электромобилларни қувватлантириш станцияларини ўрнатиш ва тармоққа улаш тартиб таомиллари соддалаштирилганини маълум қилди.
Қайд этилишича, президентнинг “Ўзбекистон — 2030” стратегиясини 2024 йилда амалга оширишга оид давлат дастури тўғрисида фармони билан, юридик шахслар томонидан электромобилларни қувватлантириш станцияларини ўрнатиш ва тармоққа улаш учун рухсат олиш 1 ойдан кўп бўлмаган муддатда амалга оширилади.
Энергетика вазирлигининг буйруғига мувофиқ “Ҳудудий электр тармоқлари” АЖ ва “Ўзэнергоинспекция” қувватлантириш станцияларини тармоққа улаш учун рухсат олиш жараёнларини белгиланган муддатларда келишиб берилишини таъминлайди.
Вазирлик аҳолини энергия ресурслари билан таъминлаш ва атроф-муҳитни ҳимоя қилишга хизмат қилувчи мазкур турдаги фаолиятлар Энергетика вазирлиги томонидан қўллаб-қувватланаётганини билдирди.
Ўзбекистонда “яшил энергетика”ни қўллаб-қувватлаш, экологик муаммоларнинг олдини олиш ва зарарли оқибатларни камайтириш мақсадида аҳолини электромобилларга ўтишини рағбатлантириш тизими жорий этилиши белгиланган.
Бундай тоифадаги автомобиллар учун давлат рақамларини беришда ундириладиган тўлов миқдорлари камайтирилади.
Изоҳ (0)